საქართველოს შინაგან საქმეთა მინისტრის, გიორგი გახარიას თქმით, მის მინისტრობამდე დანაშაულის ნაწილი არ აღირიცხებოდა, რის გამოც ახლა სტატისტიკური მაჩვენებელი გაიზრდა. ამის შესახებ მან TV პირველის ეთერში ისაუბრა.

"ოჯახში ძალადობა და ყველა სახის სტიგმატიზირებული დანაშაული, რომელზეც საზოგადოებასთან ერთად ძალიან მნიშვნელოვანი მუშაობა გავწიეთ და მომართვიანობა მართლა გაიზარდა, გაჩნდა ბევრი ისეთი დანაშაული, რომელიც მანამდე საერთოდ არ აღირიცხებოდა", — აღნიშნა გახარიამ.

ჟურნალისტის კითხვაზე, მალავდნენ თუ არა მანამდე, გახარიამ უპასუხა, რომ "ალამაზებდნენ". მეორე ჟურნალისტის დამაზუსტებელ კითხვაზე, აყალბებდნენ თუ არა წინა მინისტრები მონაცემებს, მინისტრმა ასე უპასუხა: "მეთოდოლოგიისა და პრინციპების ცვლილება უნდა დავარქვათ ამას".

კრიმინალის სტატისტიკის ზრდის შესახებ დღეს გიორგი გახარიას და პრემიერ-მინისტრ მამუკა ბახტაძეს პარლამენტში უსმენდნენ.