რესპუბლიკური პარტიის ლიდერმა, დავით უსუფაშვილმა, გადაცემა ინტერVIEW-ში, განაცხადა, რომ 2015 წლის აპრილში, ბიძინა ივანიშვილმა პრემიერ მინისტრობა შესთავაზა, თუმცა ამაზე უარი უთხრა. ამავე დროს, უსუფაშვილის თქმით, ივანიშვილის სახელისუფლებო ცენტრის რესპუბლიკელებზე აწყობა სურდა, თუმცა ეს ყველაფერი არ გამოვიდა:

"2015 წლის აპრილში მან შემოგვთავაზა ასეთი რამ: მე მართლა დავიღალე, მართლა მინდა წასვლა, ჩემი პარტიიდან ბევრი არაფერი გამოდის, ვთვლი, რომ პრემიერ-მინისტრი შესაცვლელია, მაგრამ ჩემს გუნდში ვერ ვხედავ ვინმეს, ვისაც ამას ვანდობდი, ამიტომ, მე მითხრა, რომ იქნებ შენ დათანხმდე, თუ გინდა დღესვე თუ გინდა 6 თვეში, თუ გინდა არჩევნების შემდეგ, შენზე და თქვენზე ავაწყოთ მომავალი სახელისუფლებო ცენტრი. ჩვენი პასუხი იყო ძალიან კარგად გააზრებული. მე მას ვუთხარი, ასე არ ხდება, რომ წარმატებული კომპანიის მენეჯერი სხვა კომპანიის მენეჯერად გადმოვიყვანოთ. პარტია ქართულ ოცნებას, მთავრობას და კოალიციას ვინმე რესპუბლიკელი ერთდროულად ვერ გაუძღვება-მეთქი."

უსუფაშვილის განცხადებით, მან ივანიშვილს ორი ვარიანტი შესთავაზა. ერთ-ერთის შემთხვევაში იგი დათანხმდებოდა შეთავაზებას, მხოლოდ მაშინ, თუკი ბიძინა ივანიშვილი პოლიტიკაში დაბრუნდებოდა:

"ამაზე მივიღე უარი. მეორე ვარიანტად კი, ვუთხარი რომ თავისი გუნდიდან აერჩია პრემიერ მინისტრი და იმ ორ ვარიანტში, რომელიც მას ვურჩიეთ, ერთ-ერთი ნამდვილად იყო გიორგი კვირიკაშვილი, ჯერ კიდევ 2015 წლის აპრილში".