შინაგან საქმეთა მინისტრმა გიორგი მღებრიშვილმა, 13 სექტემბერს, ჟურნალისტებთან საუბრისას განაცხადა, რომ მათი ინფორმაციით, პოლიტიკური პარტიები საპარლამენტო არჩევნებისათვის პროვოკაციებს გეგმავენ:

"არის ინფორმაციები, რომ რიგი პარტიები არჩევნების პერიოდში და მის შემდგოამაც, აპირებენ გარკვეულ პროვოკაციებს. მე თავს შევიკავებ დეტალების გამჟღავნებისგან, მაგრამ ჩვენ ამ მიმართულებით აბსოლუტურად მობილიზებულები ვართ. შინაგან საქმეთა სამინისტროს ყველა ძალა და რესურსი გააჩნია, რომ ქვეყანაში დესტაბილიზაცია არ მოხდეს".

ტელეკომპანია რუსთავი 2-თან ინტერვიუში, ნაციონალური მოძრაობის ერთ-ერთმა ლიდერმა ელენე ხოშტარიამ მღებრიშვილის განცხადება შეაფასა. მისი თქმით, სახელმწიფო ინსტიტუტის ხელმძღვანელმა პოლიტიკური განცხადებები არ უნდა გააკეთოს:

"ამ ხელისუფლებისგან ძალიან ცინიკურია ვინმეს პროვოკაციასა და ძალადობაზე საუბარი. ყველა ძალადობა ოპონენტის მიმართ, დევნა მათი ხელწერაა, რომელსაც მუდმივად ვუყურებთ. შს მინისტრი არის ძალიან მნიშვნლოვანი სახელმწიფო ინსტიტუტის ხელმძღვანელი, როგორიც არის პოლიცია, სადაც ბევრი ღირსეული პოლიციელი მუშაობს, ასეთი პოლიტიკური განცხადების გაკეთება და პოლიციელების პოლიტიკაში ჩათრევა არის საფრთხე, არა რომელიმე პოლიტიკური პარტიისთვის, არამედ მთლიანად ქვეყნის დემოკრატიული განვითარებისთვის".