კანონი და სამართალი — ამ სახელწოდებით თაკო ჩარკვიანმა პარტია უკვე დააფუძნა, რომლის ყრილობა დღეს, 10 მარტს გაიმართა. ყრილობაზე მან გუნდის წევრები წარადგინა, მათ შორის არიან:

  • ირაკლი ღლონტი;
  • მიხეილ რამიშვილი;
  • ქეთი ენუქიძე;
  • გიორგი ცობეხია;
  • თამარ პატარაია;
  • მარი საველიძე.

ყრილობას ესწრებოდნენ გაერთიანებული ოპოზიციის წევრები. დამსწრე აუდიტორიისთვის სიტყვით მიმართვისას პარტიის დამფუძნებელმა აღნიშნა, რომ ისინი სწორედ გაერთიანებულ ოპოზიციასთან ერთად იმუშავებენ, მოვიდნენ ხელისუფლებაში კოალიციური მთავრობით. მისივე თქმით, ბოლო არჩევნებიდან გამომდინარე, შესაძლებელია ოპოზიციის გამარჯვება და სწორედ მაშინ დაიგეგმა მისი პარტიის შექმნა:

"ისეთი შეგრძნება მაქვს თითქოს ვიღაცამ ჩემი ქვეყანა, ახალგაზრდების ენაზე რომ ვთქვა, "მოთაგა," დაიბევა. რას ვგულისხმობ ამაში, რამდენადაც შესაძლებელი იყო ჩავიხედეთ და ამოვიღეთ მასალები. მიწებია გაყიდული ისე რომ მწირი ინვესტიციაც კი არ არის განხორციელებული. 2012 წელს შემგვეპარა რუსული კორუფციული მართვის სტილის ვასალი, რომელიც ახლა მიზის შუშის სასახლეში და ჩემი სამშობლო უნდა რომ "მოთაგოს", დაიბევოს, იყიდოს და ჩვენ ვუყურებთ ახალგაზრდები როგორ გვრჩებიან უქონელები, უმუშევრები".

თაკო ჩარკვიანი 2018 წლის საპრეზიდენტო არჩევნებში გაერთიანებულ ოპოზიციას შეუერთდა. ის აქტიურად იყო ჩართული მათი კანდიდატის, გრიგოლ ვაშაძის საარჩევნო კამპანიაში. 2012 წელს საპარლამენტო არჩევნების დროს კი ის ქართული ოცნების მხარდამჭერი იყო.