ოჯახი ამტკიცებს, რომ ხონის ფსიქიატრიულ კლინიკაში 45 წლის პაციენტი, გერონტი აქუბარდია ცემით პერსონალმა მოკლა. გარდაცვლილის ოჯახი რუსთავი 2-თან ყვება, რომ პაციენტი საავადმყოფოში 14 ოქტომბერს მოათავსეს, ექვს დღეში კი ნაცემი ქუთაისის კლინიკაში გადაიყვანეს.

"ადმინისტრაციას აქვს დიდი დანაშაული. ჩვენ ჩავაბარეთ პაციენტი, მაგათმა კი მკვდარი გაასვენეს... ჩაშავებული ჰქონდა თვალი, ხელი, ფეხი, ტანი", — ამბობს გარდაცვლილის და. პაციენტის ძმა, გოჩა აქუბარდია ყვება, რომ შემთხვევამდე ძმამ უთხრა, რომ კლინიკაში ეუხეშებოდნენ და სცემდნენ.

ფსიქიატრიული ჯანმრთელობის ცენტრის ნებაყოფლობითი ფსიქიატრიული მკურნალობის დეპარტამენტის ხელმძღვანელი, მარიამ გიორგაძე ტელეკომპანიასთან ამბობს, რომ კონფლიქტი პაციენტებს შორის მოხდა და გერონტი აქუბარდია სხვა ბენეფიციარმა სცემა. მისივე თქმით, ბენეფიციარმა გარდაცვლილს ხელი დაარტყა.

აღნიშნულ ფაქტთან დაკავშირებით შინაგან საქმეთა სამინისტრომ გამოძიება სისხლის სამართლის კოდექსის 126-ე ძალადობის მუხლით დაიწყო. უწყებაში On.ge-ს უთხრეს, დაინიშნა არაერთი ექსპერტიზა, მათ შორის კომპლექსური ექსპერტიზაც. როგორც სამინისტროს პრესსამსახური ამბობს, ექსპერტიზის შედეგების მიღების შემდეგ განხორციელდება შესაბამისი საგამოძიებო მოქმედებები.