რუსთავი 2-ში სტუმრობისას, პაატა ბურჭულაძის პარტიის სახელმწიფო ხალხისთვის ერთ-ერთმა წევრმა და საარჩევნო სიის მეხუთე ნომერმა ირაკლი ყიფიანმა ისაუბრა იმ კრიტერიუმებზე, რომელთა გათვალისწინებითაც დაკომპლექტდა ბლოკის საარჩევნო სია და ასევე განმარტა მიზეზები, თუ რატომ არ იყვნენ მასში გიორგი რუხაძე და ხათუნა ლაგაზიძე:

"სია დაკომპლექტდა იდეის გარშემო შეკრებილი ადამიანებით, იმ ადამიანებით, რომლებმაც აჩვენეს კომპეტენცია, რომლებმაც შექმნეს ეკონომიკური განვითარების პლატფორმა და სამართლის პროგრამა. შესაბამისად, ჩვენ ავიღეთ მთავარ ინდიკატორად არა ის თუ ვინ იქნებოდა პირველ ათეულში ან პირველ თხუთმეტეულში, არამედ ის, თუ ვინ რა გააკეთა ბლოკისთვის და პარტიისთვის".

ყიფიანის თქმით, სიის დაკომპლექტება კონკურენციის პირობებში მოხდა და შრომა დაუფასდათ იმ ადამიანებს, რომლებმაც ეკონომიკური და სამართლის პროგრამა შექმნეს, მათ შორის კი ხათუნა ლაგაზიძე და გიორგი რუხაძე არ იყვნენ:

"პირველ ათეულს ძირითადად იკავებს ეკონომიკური ჯგუფი და იურიდიული ჯგუფი, ეს არის ის გუნდი, რომელიც პარლამენტში რეალურად შექმნის პროდუქტს".

ყიფიანმა დასძინა, რომ რუხაძემ თავად თქვა სიაში ყოფნაზე უარი, ლაგაზიძე კი კონკურენციის გამო ვერ მოხვდა სიაში:

"სამწუხაროდ ადამიანები ჩვენს პარტიას ტოვებენ მხოლოდ იმიტომ, რომ მათი ნაწილი ფოკუსირებულია მხოლოდ იმაზე, თუ სად იქნებიან სიაში და სიის ნომრიდან გამომდინარე იღებენ გადაწყვეტილებებს".

პარტია სახელმწიფო ხალხისთვის სიის მე-5 ნომერი მიიჩნევს, რომ პოლიტიკას პროფესიონალი ადამიანები უნდა ქმნიდნენ.