"მთავარია, რომ ბრალდებულია", — ასე შეაფასა ხორავას ქუჩაზე მოკლული მოზარდის მამამ, ზაზა სარალიძემ მირზა სუბელიანის განაჩენი. სხდომის დასრულების შემდეგ სარალიძემ ჟურნალისტებს უთხრა, რომ გამოძიება დაადგენს რა ბრალი შეიძლება წაეყენოს კიდევ მირზა სუბელიანს:

"ჩემი მიზანი არაა, აქ წლები გამოიკეტოს ვინმე. ჩემი მიზანია ჭეშმარიტების დადგენა... წესით, მირზა სუბელიანის მსგავსი ადამიანები გარეთ არ უნდა დადიოდნენ".

თბილისის საქალაქო სასამართლომ დანაშაულის დაფარვის ბრალდებით მირზა სუბელიანს ერთი წლითა და ერთი თვით პატიმრობა მიუსაჯა. მას სასჯელი ათვლა პატიმრობის დღიდან დაეწყება, შესაბამისად, ის საპატიმრო დაწესებულებას 4 თვეში დატოვებს. გარდა ამისა, მირზა სუბელიანს ბრალი გადაუკვალიფიცირდა დანაშაულის შეუტყობინებლობიდან დანაშაულის დაფარვაში.

დღევანდელ, 4 მარტის სხდომაზე დაცვის მხარემ დასკვნითი სიტყვა წარმოთქვა. ისინი მოითხოვდნენ სუბელიანისთვის ყველაზე მსუბუქი სახის სასჯელს, ჯარიმას, 2 000 ლარის ოდენობით. ბრალდების მხარე კი სუბელიანის დამნაშავედ გამოცხადებას ითხოვდა.

მირზა სუბელიანი 9 ივნისს დანაშაულის შეუტყობინებლობის ბრალდებით დააკავეს. წარდგენილი ბრალის თანახმად, პირველ დეკემბერს თბილისში, ხორავას ქუჩა #4-ის მიმდებარე ტერიტორიაზე ორი არასრულწლოვნის მკვლელობის შემდეგ მან გაიგო ერთ-ერთი არასრულწლოვნის, გ.ჯ.-ს დანაშაულის შესახებ და არ შეატყობინა სამართალდამცავ ორგანოებს. ადვოკატის თქმით, სუბელიანი ბრალს აღიარებს.

სასამართლომ აღკვეთის ღონისძიებად მას პატიმრობა 10 ივნისს შეუფარდა. 27 თებერვალს კი სასამართლომ ის პატიმრობაში დატოვა.