პარიზის ტერაქტში ბრალდებული მის მიმართ წაყენებული ბრალდებების განხილვისათვის მზად არ არის, რადგან ბელგიიდან საფრანგეთში გადაფრენისგან დაიღალა. ამის შესახებ ინფორმაციას CNN ავრცელებს.

2015 წლის 13 ნოემბერს პარიზში მომხდარ ტერორისტულ აქტში ბრალდებული, სალაჰ აბდესლამი, მის მიმართ წაყენებული ბრალდებების განხილვაზე უარს ამბობს და განმარტავს, რომ ბელგიიდან საფრანგეთში გადაფრენისგან ძალიან დაიღალა. ბელგიის მხარემ აბდესლამი საფრანგეთს გუშინ, 27 აპრილს, გადასცა.

საფრანგეთის იუსტიციის მინისტრის, ჟან-ჟაკ ურვოასის განმარტებით, მას შემდეგ, რაც აბდესლამი ბელგიიდან საფრანგეთში გადაიყვანეს, ის ციხეში განცალკევებულ საკანში მოათავსეს, სადაც უსაფრთხოების ზომები მაქსიმალურად დაცულია:

"მასზე [აბდესლამზე] პასუხისმგებლობა სპეციალურმა სადაზვერვო სამსახურმა აიღო, რომელშიც კვალიფიციური აგენტები შედიან და მათ განსაკუთრებით საშიში დამნაშავეების დაკავება ევალებათ".

აბდესლამის მორიგი სასამართლო პროცესი 20 მაისს ჩანიშნეს.

სალაჰ აბდესლამი ერთადერთია, ვინც ცოცხალია იმ ადამიანებიდან, რომლებსაც ბრალად პარიზის ტერაქტის მოწყობა ედებათ. ის ბელგიაში 2016 წლის მარტში დააკავეს.