შინაგან საქმეთა სამინისტრომ თბილისის საქალაქო სასამართლოს გადაწყვეტილების საფუძველზე გაერთიანებული ოპოზიციის წევრი ზვიად კუპრავა დააკავა. ამის შესახებ ინფორმაცია შინაგან საქმეთა სამინისტრომ გაავრცელა.

შსს-ში განმარტავენ, რომ ზვიად კუპრავას დაკავების საფუძველი სასამართლოს მიერ მიღებული გადაწყვეტილება გახდა აღმკვეთი ღონისძიების პატიმრობით შეცვლის თაობაზე.

საქმე ეხება თბილისის საქალაქო სასამართლოში 2018 წლის 11 ივნისს მომხდარ შემთხვევას, რა დროსაც კუპრავამ მოსამართლეს სასამართლოს შენობაში სიტყვიერი შეურაცხყოფა მიაყენა. ზვიად კუპრავას ბრალად სასამართლოს უპატივცემულობა ედება. მას აღკვეთის ღონისძიების სახით შეეფარდა გირაო.

შსს-ს განმარტებით, გირაოს ქვეშ მყოფმა ზვიად კუპრავამ, ასევე სასამართლოს მიმდებარე ტერიტორიაზე, ფიზიკური შეურაცხყოფა მიაყენა ადვოკატს. აღნიშნული ქმედებისთვის ზვიად კუპრავას სისხლის სამართლის კოდექსის 126-ე მუხლით (ძალადობა) ბრალი დაუსწრებლად წარედგინა, ვინაიდან მან თავი აარიდა სამართალდამცავ ორგანოში გამოცხადებას.

გირაოს პირობების დარღვევის — ახალი დანაშაულის შესაძლო ჩადენის, სამართალდამცავ ორგანოში არგამოცხადების, მართლმსაჯულებისთვის თავის არიდების — გამო, სასამართლოს გადაწყვეტილებით მიმდინარე წლის 21 თებერვალს ზვიად კუპრავას გირაო შეეცვალა უფრო მკაცრი აღკვეთის ღონისძიებით — პატიმრობით. სასამართლო სხდომა ჩატარდა ზვიად კუპრავას გარეშე.