საქართველოს ეროვნული ბანკის მიერ განხორციელებული ცვლილების მიხედვით, მიკროსაფინანსო ორგანიზაციები ვალდებულები ხდებიან მომხმარებელს ლარის ბანკნოტები და მონეტები სხვა ნომინალის ლარის ბანკნოტებში და მონეტებში შეუფერხებლად გადაუცვალონ.

დღემდე მოქმედი წესი მიკროსაფინანსო ორგანიზაციებს ლარის ბანკნოტების გამოცვლას არ ავალდებულებდა და ეს პროცესი დამოკიდებული იყო თითოეული საფინანსო ორგანიზაციის შიდა პროცედურაზე.

წესის ახალი რედაქციის თანახმად, მიკროსაფინანსო ორგანიზაციები, რომლებიც ახორციელებენ ნაღდ ფულთან დაკავშირებულ ოპერაციებს, ვალდებულნი არიან არამეწარმე ფიზიკური პირისთვის ყოველგვარი საზღაურის და შეფერხების გარეშე განახორციელონ I და II კატეგორიის ვარგისიანობის ლარის ბანკნოტების და მონეტების გამოცვლა ან გადაცვლა სხვა ნომინალის ლარის ბანკნოტებზე ან მონეტებზე (გარდა ყალბი ლარის ბანკნოტების და მონეტებისა).

მიკროსაფინანსო ორგანიზაცია ვალდებულია არ დაუშვას II კატეგორიის ლარის ბანკნოტების და მონეტების მიმოქცევაში დაბრუნება და უნდა უზრუნველყოს მათი კომერციულ ბანკში ჩაბარება ან გამოცვლა.

ცვლილებების წარმოდგენილი რედაქცია ასევე უზრუნველყოფს, რომ II კატეგორიის ვარგისიანობის ლარის ბანკნოტები და მონეტები აღარ მოხვდეს მიმოქცევაში. კომერციულმა ბანკებმა ისინი ეროვნულ ბანკს უნდა მიაწოდონ.