ევროპული საქართველოს დეპუტატი დავით ბაქრაძე თიბისი ბანკის სამეთვალყურეო საბჭოს თავმჯდომარეს მამუკა ხაზარაძეს პარლამენტში იბარებს. ბაქრაძე სთავაზობს ხაზარაძეს დაესწროს იმ საკომიტეტო მოსმენას, სადაც ეროვნული ბანკის პრეზიდენტი, კობა გვენეტაძეც იქნება.

დავით ბაქრაძის განცხადებით, უმცირესობამ ეროვნული ბანკის პრეზიდენტი უკვე დაიბარა პარლამენტში. დაბარების ძირითადი თემა საბანკო რეგულაციებია.

"პარლამენტის წევრებთან და ჟურნალისტებთან ერთად, საზოგადოებისთვის ღიად და გასაგებად ვისაუბროთ ყველაფერზე, რა ხდება, რა მდგომარეობაა და რა პრეტენზიები აქვს ეროვნულ ბანკს თიბისის მიმართ და თიბისი ბანკს ეროვნული ბანკის მიმართ", — განაცხადა დავით ბაქრაძემ.

მისი თქმით, საზოგადოებისთვის მისაღები ფორმა იქნება, თუ საპარლამენტო ფორმატში თიბისი ბანკისა და ეროვნული ბანკის პრეზიდენტი ერთმანეთს ღიად დაუპირისპირდებიან.

"გაირკვეს, რომელი მხარე არის მართალი და რომელ მხარეს რა პრეტენზია აქვს", — განაცხადა დავით ბაქრაძემ.

თიბისის საქმე

8 იანვარს გავრცელდა ინფორმაცია, რომ პროკურატურამ თიბისი ბანკიდან დოკუმენტები ამოიღო. მაშინ პროკურატურამ განმარტა, რომ თიბისი ბანკის 2008 წლის აქტივობები შეიცავდა ფულის გათეთრების ნიშნებს და მასში თიბისის დამფუძნებლები და ამავდროულად სამეთვალყურეო საბჭოს თავმჯდომარე, მამუკა ხაზარაძე და მისი მოადგილე ბარი ჯაფარიძე ფიგურირებდნენ.

ამ საქმესთან დაკავშირებით საქართველოს ეროვნულმა ბანკმა მათი ხელმძღვანელი თანამდებობიდან გადაყენება მოითხოვა. თიბისი ბანკში ამბობენ, რომ აპირებენ სამართლებრივი საშუალებები გამოიყენონ ბანკისა და აქციონერების ინტერესების დასაცავად.