ბიძინა ივანიშვილი სამეგრელოს მედიის წარმომადგენლებთან შეხვედრაზე დავით ნარმანიას საქმიანობას აფასებს და ამბობს, რომ მისი მერობის პერიოდში თბილისი ძალიან გაიზარდა, თუმცა ნაციონალური მოძრაობა კვლავ ახერხებს მისთვის თემის აგორებას:

"ნაციონალურმა მოძრაობამ შეძლო კვლავ თემის აგორება და ნახეთ თან როგორი ხალხი. ფერაძე არის რეალური სახე ნაციონალური მოძრაობის, ეს ხალხი უგორებს ნარმანიას ოპოზიციას, კარვებს უდგამენ".

ყოფილი პრემიერის განმარტებით, ნარმანიაზე კორუფციასთან კავშირის შესახებ არავის უთქვამს ფერაძის და "ესეთი უარგუმენტო და უპასუხისმგებლო ხალხის გარდა". მისი აზრით, ნარმანიას მხოლოდ საზოგადოებასთან კომუნიკაცია შეეშალა.

"შეხვედრები რეგიონულ მედიასთან", - ასე ჰქვია ტელეკომპანია GDS-ის ახალ საარჩევნო პროექტს, რომელშიც ყოფილი პრემიერ-მინისტრი ბიძინა ივანიშვილი მონაწილეობს.

გადაცემას 2030-ის ჟურნალისტები ნათია თოიძე და მიხეილ ფეიქრიშვილი უძღვებიან. პროექტის პირველი გადაცემა 1 სექტემბერს, 12:00 საათზე აჭარიდან გავიდა GDS-ის პირდაპირ ეთერში.

ყოფილი პრემიერი პირველად აჭარის და გურიის რეგიონის ჟურნალისტებს უკვე შეხვდა, ამჯერად ის სამეგრელოს მედიის წარმომადგენლებთან მართავს შეხვედრას.