ქუჩის ბიჭების სოლისტის, ირაკლი ნოზაძის იგივე პიკასოს განზრახ მკვლელობის მცდელობისთვის ბრალდებული თათია ჯანჯღავა დამნაშავედ სცნეს. თბილისის საქალაქო სასამართლომ მსჯავრდებულს 8 წლით პატიმრობა მიუსაჯა. ამავე საქმეზე დანაშაულის შეუტყობინებლობისთვის 2 წლით თავისუფლების აღკვეთა შეეფარდა ბრალდებულის მეგობარს.

სასამართლოს ინფორმაციით, 2018 წლის 25 ივნისს მკვლელობაში ბრალდებულმა ვალის დაბრუნების გამო შურისძიების მოტივით ირაკლი ნოზაძეს დანით ჭრილობები მიაყენა და არტერია დაუზიანა. ბრალდებულმა შემთხვევის ადგილი მეგობართან ერთად დატოვა.

სამართალდამცველებმა ისინი 2018 წლის 26 ივნისს ქ. თბილისში დააკავეს. ჯანჯღავას ბრალდება სისხლის სამართლის კოდექსის 19-108-ე მუხლით (განზრახ მკვლელობის მცდელობა), ხოლო მის მეგობარს 376-ე მუხლით (განსაკუთრებით მძიმე დანაშაულის შეუტყობინებლობა) წარედგინა.