საქართველოს ეროვნული მუზეუმი აცხადებს, რომ სიცრუეა სოციალურ ქსელებში გავრცელებული ინფორმაცია იმის შესახებ, რომ ვანში აღმოჩენილ ძვ.წ. V საუკუნით დათარიღებულ ყელსაბამს 12 ცალი კუს გამოსახულებიანი ფიგურა აკლდა. ფეისბუქზე სხვადასხვა გვერდები წერდნენ, რომ ლიეჟში მიხეილ სააკაშვილისისა და ემიგრანტების შეხვედრის დასაორგანიზებლად ნაციონალური მოძრაობის ყოფილმა მაღალჩინოსანმა ყელსაბამიდან რამდენიმე კუს გამოსახულება გაყიდა.

მათი თქმით, მსგავსი ცრუ ინფორმაცია გასულ წლებშიც ვრცელდებოდა და საზოგადოების მაღალი ინტერესიდან გამომდინარე 2013 წელს საქართველოს კულტურისა და ძეგლთა დაცვის მინისტრის ბრძანებით შეიქმნა საქართველოს ეროვნული მუზეუმიდან 2004-2012 წლებში ექსპონატების გატანა-შემოტანის საკითხის შემსწავლელი დროებითი კომისია. მათივე თქმით, კომისიამ დაასკვნა, რომ ყველა ექსპონატი ადგილზეა და მათი ავთენტურობა ეჭვს არ იწვევს.

მუზუმში აცხადებენ, რომ ვანის ყელსაბამი წარმოდგენილია სიმონ ჯანაშიას სახელობის საქართველოს მუზეუმის საგანძურის მუდმივმოქმედ გამოფენაზე, ამჟამად კი გამოფენილია ფრანკფურტის ლიბიგჰაუსის მუზეუმში, ფრანკფურტის საერთაშორისო წიგნის ბაზრობის საპატიო სტუმრის პროგრამის ფარგლებში. გამოფენის დასრულების შემდეგ, 5 მარტიდან, ყელსაბამი კვლავ გამოიფინება სიმონ ჯანაშიას სახელობის საქართველოს მუზეუმის საგანძურში.