ტელეკომპანია რუსთავი 2-ის გენერალური დირექტორი ნიკა გვარამია მიმართავს უზენაეს სასამართლოს, რომ დროულად მიიღონ გადაწყვეტილება და ის საჯაროდ ამცნონ საზოგადოებას:

"ნუ გვამყოფებენ ტერორის ქვეშ, მივმართავთ სასამართლოს რომ გასაიდუმლოებულ ვითარებაში კიარა, საჯაროდ გამოაქვეყნოს თავისი პასუხი, არ გამოაგზავნოს ფოსტით, იმიტომ რომ სახელმწიფო და საზოგადოებრივი ინტერესი არის ძალიან მაღალი".

ამის შესახებ მან 6 სექტემბერს, სპეციალურად გამართულ ბრიფინგზე განაცხადა.

ნიკა გვარამია განმარტავს, რომ მათი მთავარი არგუმენტი ამ საქმეში არის არა ირაკლი ოქრუაშვილის ხელშეკრულება, არამედ ის, რომ რუსთავი 2-ის კანონიერი მფლობელები არიან კანონიერად მართლები:

"მათ მიერ განხორციელებული ნასყიდობის ხელშეკრულება არის სრულიად კანონიერი და მისი ბათილობის საკითხი ვერ დადგება სასამართლოში".

გვარამიამ მაგალითად მოიყვანა უზენაესი სასამართლოს მიერ წარსულში განხილული ერთ-ერთი საქმე. მისი თქმით, რუსთავი 2-ის მსგავსი საქმის შემთხვევაში, უზენაესმა იგი უკან, წინა ინსტანციებში დააბრუნა განსახილველად:

"სასამართლომ, რომელიც დღეს იხილავს საქმეს უზენაეს სასამართლოში, ორი თვის წინ, ივლისში გამოაქვეყნა დასაბუთებული გადაწყვეტილება საქმეზე, სადაც მხარეები იყვნენ თამაზ ნიჟარაძე და ფოთის საზღვაო ნავსადგური. ამ საქმეზე დაადგინა რომ ფასის დისპროპურციულობის გამო, არ შეიძლება საკუთრებასთან დაკავშირებული ხელშეკრულებების ბათილობა. ფასის დისპროპორციულობა ჩვენს შემთხვევაში დადგენილია სრულიად უსაფუძვლოდ, მაგრამ მიუხედავად ამისა ჩემს მიერ ხსენებულ საქმეში ამავე შემადგენლობამ დაადგინა, რომ ფასის დისპროპურციულობის გამო არ შეიძლება ხელშეკრულების ბათილობა".

გვარამიას თქმით, უზენაესი სასამართლოს იმავე შემადგენლობამ, არ უნდა გამოიტანოს განსხვავებული გადაწყვეტილება რუსთავი 2-ის საქმეზე. მისივე განცხადებით, მათი მოლოდინია რომ უზენაესი მათ საჩივარს დასაშვებად ცნობს და კასაციას სრულად დააკმაყოფილებს.