დღეს, 7 თებერვალს განათლების მინისტრმა, მიხეილ ბატიაშვილმა პარლამენტში, სადაც ის დეპუტატებს თავისი უწყების მუშაობის ანგარიშს აცნობს, თქვა, რომ დამამთავრებელ კლასებში სკოლამ როლი დაკარგა, ვინაიდან მოსწავლეები მისაღებ გამოცდებზე არიან ორიენტირებული.

"დღევანდელ ვითარებას, რაც სკოლაში გვაქვს, მე დავარქმევდი აბსოლუტურ კორუფციას, განათლებას, რასაც ჩრდილოვანი ჰქვია და სადაც მიედინება ასობით მილიონი ლარი", — ამბობს განათლების მინისტრი რეპეტიტორებზე, რომლებსაც მოსწავლეები დამამთავრებელ კლასებში მიმართავენ.

"მე ვიტყოდი, რომ დღევანდელ სისტემაშიც გვაქვს ჩრდილოვანი განათლება, რომელიც ნაწილობრივ კორუფციულ ელემენტებსაც შეიცავს. ამაში მშობლები ხარჯავენ ასეულობით მილიონობით ლარს".

ბატიაშვილის თქმით, კვლევის შედეგებით, მათ შორის NDI-ის კვლევით, ყველაფერი ორიენტირებულია არა განვითარებაზე, არამედ განათლების სისტემის ხარისხის გაუარესებაზე.