ირლანდიელი მსახიობი ლიამ ნისონი გულწრფელი და ამავდროულად რასისტული კომენტარების შემდეგ კრიტიკის ქარცეცხლში გაეხვა.

ორშაბათს გამოქვეყნებულ Independent-თან ინტერვიუში, მსახიობი იხსენებს, რომ წლების წინ, მისი მეგობარი ქალი გააუპატიურეს. მსხვერპლის სიტყვებით, მოძალადე ფერადკანიანი იყო.

66 წლის მსახიობმა თავის მაშინდელ ემოციებზე საუბრისას თქვა, რომ გაბრაზებული დაიარებოდა ქუჩებში "მძიმე ჯოხით" და სურდა, თავისი აგრესია "ვინმე შავკანიანზე" გადაეტანა და სინანულით ისიც კი აღიარა, რომ უდანაშაულო ადამიანის მოკვლისთვისაც იყო მზად.

ნისონი ინტერვიუში აღნიშნავდა, რომ განიცდიდა თავის ასეთი "საშინელ" რეაქციას. მან დასძინა, რომ მიუხედავად განწყობისა, არავისზე უძალადია.

მსახიობის გულახდილი ინტერვიუ საზოგადოებამ დანაშაულის აღიარებად არ მიიღო. კრიტიკის გამო სტატიის გავრცელების მეორე დღეს ნისონმა ABC-ის ეთერში თქვა, რომ რასისტი არაა და მისი მიზანი იყო, რომ თავისი წარსული ისტორიით რასიზმის თემაზე საუბრის დაწყებაში დახმარებოდა საზოგადოებას.

ნისონის ინტერვიუ მისი ახალი ფილმის Cold Pursuit-ის ხელშეწყობისკენაც იყო მიმართული. ფილმის სიუჟეტის მიხედვით, მამა, რომელსაც შვილი მოუკლეს, სამაგიეროს გადახდას ცდილობს.

როგორც გარდიანი წერს, გადაიდო ფილმთან Cold Pursuit დაკავშირებული ღონისძიება. კინოსტუდია Lionsgate-მა საკითხთან დაკავშირებუთ კომენტარი არ გააკეთა, თუმცა, გამოცემას წყარომ დაუდასტურა, რომ ამ კომენტარების შემდეგ, წითელი ხალიჩა და ფოტოგრაფების წინაშე მსახიობის პოზირება უადგილო იქნებოდა.

მედიის ნაწილმა ირლანდიელი მსახიობის ინტერვიუ "კარიერულ თვითმკვლელობად" შეაფასა. სტატიის ავტორმა და Independent-ის ჟურნალისტმა, კლემენს მაიკოლანმა, თქვა, რომ საუბრისას ნისონმა რასისტული სლენგი გამოიყენა.

თუმცა, ზოგი გამოცემა მსახიობზე ამბობს, რომ ის საკმაოდ მამაცია, რომ წარსულის "საშინელი ზრახვები" სინანულით გაასაჯაროვა.