პარლამენტის თავჯდომარე, დავით უსუფაშვილი ყოფილი პრემიერის, ბიძინა ივანიშვილის ბრალდებებს პასუხობს და განმარტავს, რომ ივანიშვილის პოტენციური პარტნიორი უფრო პატრიოტთა ალიანსია, ვიდრე რესპუბლიკური პარტია ან თავისუფალი დემოკრატები:

"მე ვწუხვარ, რომ ბიძინა ივანიშვილმა 2016 წლის საპარლამენტო არჩევნებისთვის სხვა პროექტი წარმოიდგინა, იმის განსხვავებით, რაც ჰქონდა 2011-2012 წლებში. რესპუბლიკელებს აღმოგვიჩინა პრობლემა, რომ თურმე ჩვენ ილია ჭავჭავაძეს ცუდ კაცად ვთვლით. მე ვწუხვარ, რომ აქამდე დავიდა საქმე. ეს არ ვიცი, კრიტიკა თუ რა არის. უნდა ამოვიდეთ იქიდან, რომ პოლიტიკური პროცესი არის ციკლური პროცესი. 4 წელი ვიცხოვრეთ ისე, როგორც ვიცხოვრეთ".

5 სექტემბერს გურიის რეგიონულ მედიასთან შეხვედრაზე ბიძინა ივანიშვილმა განაცხადა, რომ რესპუბლიკელებს ძალიან დაბალი რეიტინგი აქვთ და ამას საზოგადოება სრულიად სამართლიანად აფასებს, რისი მიზეზიც ისაა, რომ რესპუბლიკური პარტიისთვის სახელმწიფო იწყება იქ, სადაც იწყება რესპუბლიკური პარტია და მთავრდება ზუსტად იქ, სადაც მთავრდება რესპუბლიკური პარტია.