საქართველოს გენერალური პროკურატურაში ამბობენ, რომ ტერიტორიაზე თვითნებურად შეჭრის გამო ზაზა სარალიძესთან კომუნიკაცია ვერ შედგება. უწყება აცხადებს, რომ მზადაა საქმიანი ნორმალური კომუნიკაციის ფორმატში შეხვდეს სარალიძეს. პროკურატურის ცნობით, შეხვედრა დაიგეგმა მომდევნო კვირას, სამშაბათს, 12 თებერვალს:

"პროკურატურა ორგანიზებას გაუწევს ზაზა სარალიძისა და სამივე მიმდინარე საქმის მოქმედი პროკურორების შეხვედრას, რომელიც შედგება სამშაბათს. დროისა და ადგილის შესახებ ინფორმაცია გახდება ცნობილი როგორც თავად ზაზა სარალიძისთვის, ასევე ეცნობება საზოგადოებას.

საქართველოს გენერალური პროკურატურა მუდმივად მზად არის კომუნიკაციისა და პრობლემურ საკითხებზე მსჯელობისთვის ნებისმიერ პირთან, იქნება ეს დაზარალებული, ბრალდებული თუ დაინტერესებული პირი ამა თუ იმ საქმეზე".

ზაზა სარალიძე ადვოკატთან და მხარდამჭერებთან ერთად დღეს, 6 თებერვალს მთავარ პროკურორთან შესახვედრად მივიდა. იგი პროკურატურის ეზოში შევიდა, თუმცა შენობაში სესვლის უფლება უსაფრთხოების სამსახურმა არ მისცა. სარალიძეს პროკურატურის შენობა ძალის გამოყენებით დაატოვებინეს, რის შემდეგაც შესასვლელთან პოლიციის კორდონი გაჩნდა.