საპარლამენტო უმრავლესობის წევრი, ეკა ბესელია, რომელსაც პირადი ცხოვრების ამსახველი კადრები გაუვრცელეს, ამბობს, რომ ამ პროცესს სახელის დარქმევა და გამიჯვნა სჭირდება. მან TV პირველზე მის ვიდეოს შესახებ თანაგუნდელების ზოგიერთ კომენტარს სამარცხვინო უწოდა.

წამყვანმა დეპუტატს თანაგუნდელების: სოფო კილაძის, კახა კალაძის, ირაკლი კობახიძის, გია ვოლსკისა და თამარ ჩუგოშვილის კომენტარების შეახსენა, დეპუტატმა კი თქვა:

"მათაც ვგულისხმობ, არ მინდა დავკონკრეტდე, ვოლსკი იტყვის ამას, თუ კილაძე — ასე საუბარი, რომ არ მინახავს, არ უნახავს და ამიტომ... უხერხულია, რა... ძალიან უხერხულია, ხალხო. რა უნდა ნახოთ? ნახოთ და მერე გაგიჩნდებათ პროტესტის განცდა? არ მინდა გავაგრძელო საუბარი იმიტომ, რომ მე შიგნით [მექნება]... ყველამ თავის თავს და იმიჯს უნდა სცეს პატივი, თორემ მე არ მჭირდება არავის ჭირისუფლობა და არ მომწონს საერთოდ მსხვერპლის როლში ყოფნა".

ბოლო რამდენიმე დღეა ინტერნეტში ეკა ბესელიას პირადი ცხოვრების ამსახველი კადრები ვრცელდება. ორივე შემთხვევაში დეპუტატმა საჯაროდ თქვა, რომ ეს ვიდეომასალა მას ფარულად გადაიღეს. ვიდეომასალის გავრცელებას წინ უსწრებდა ბესელიას დაპირისპირება იმ 10-კაციან სიასთან, რომელიც უზენაეს სასამართლოში უვადო მოსამართლეებად უნდა გამწესებულიყო.

ამავე თემაზე: ვის ინტერესებში შეიძლება, იყოს ჩანაწერების გავრცელება — ეკა ბესელიას ვერსია და ეჭვები