ერთიანი ნაციონალური მოძრაობის ვაკის მაჟორიტარი დეპუტატობის კანდიდატი, ელენე ხოშტარია მიიჩნევს, რომ ქართული ოცნების ახალი სახის, თამარ ჩუგოშვილის განცხადება, რომლითაც მან ნაცმოძრაობა მოსალოდნელ პროვოკაციაში დაადანაშაულა, ცინიკურია:

"ძალიან ცინიკურია ქართული ოცნების მხრიდან პროვოკაციაზე საუბარი იმიტომ, რომ ოთხი წლის განმავლობაში და საარჩევნო პერიოდშიც, ჩვენ ვხედავთ, რომ სისტემატიური ხასიათი აქვს ნაციონალური მოძრაობის მიმართ ძალადობას ქართული ოცნების მხრიდან."

On.ge-სთან საუბარში ელენე ხოშტარიამ აღნიშნა, ქართულ ოცნებას არ აქვს იმის თქმის უფლება, რომ თითქოს, ნაციონალური მოძრაობა ქართული ოცნების მიმართ პროვოკაციებს ამზადებს, რადგან ოცნების მხრიდან მუდმივად ხდება ნაციონალური მოძრაობაზე ძალადობის წახალისება და დაუსჯელობა:

"მაგალითად, კორცხელის ინციდენტიც საკმარისია და ასევე, ჩემი ოფისის დარბევა. მესამე დღეა ამ საქმეზე პროკურატურას არავინ დაუკითხავს და არასერიოზულ დამოკიდებულებას იჩენს. ამ ფონზე, ცხადია, ასეთი განცხადებების კეთება მათი მხრიდან ცინიკურია."

ხოშტარიას განცხადებით, ქართულ ოცნებაში ავიწყდებათ, რომ მმართველი გუნდს პასუხისმგებლობა აკისრია წინასაარჩევნო გარემოზე, ძალადობრივ ფონზე და უკანონობაზე. ხოშტარიას თქმით, ჩუგოშვილის განცხადება იმის შესახებ, რომ წინასაარჩევნო გარემოს უზრუნველყოფა მმართველი პარტიის გარდა ოპოზიციურ პარტიებსაც ევალებათ პასუხისმგებლობის თავიდან აცილების მცდელობაა და ხაზს უსვამს იმას, რომ მათ საერთოდ არ ესმით რას ნიშნავს ხელისუფლებაში ყოფნა:

"მათ არ ესმით, რომ როცა ქვეყანაში ხდება არაერთი ძალადობა, ამას უნდა გაეცეს პასუხი, სხვა შემთხვევაში ეს აზიანებს მთლიანად ქვეყანას, რასაც ჩვენ ვუყურებთ ოთხი წელია. არც ერთი შემთხვევა ოპოზიციაზე ძალადობისა არ ყოფილა გამოძიებული და არავინ დასჯილა. სამწუხაროა, რომ პოლიტიკაში მოსულ ახალ სახეებს ეს არ ესმით. "

დღეს გამართულ ბრიფინგზე ქართული ოცნება-დემოკრატიული საქართველოს წევრმა თამარ ჩუგოშვილმა განაცხადა რომ ერთიან ნაციონალურ მოძრაობა წინასაარჩევნოდ გარკვეული სახის არეულობს გეგმავს. მათთვის ცნობილია რომ მზადდება სხვადასხვა ტიპის დაპირისპირების პროვოცირება ქართული ოცნების დაგეგმილ ღონისძიებებზე , ასევე, ორგანიზებული ფორმით დაძაბულობისა და დაპირისპირების შეტანა წინასაარჩევნო კამპანიის პროცესში.