ნაციონალური მოძრაობა წინასაარჩევნოდ დაპირისპირებების პროვოცირებას და არეულობის შექმნას გეგმავს - ამის შესახებ დღეს გამართულ ბრიფინგზე ქართული ოცნება-დემოკრატიული საქართველოს წევრმა თამარ ჩუგოშვილმა განაცხადა:

„საარჩევნო კამპანია შედის აქტიურ ფაზაში. ამ დრომდე წინასაარჩევნო კამპანია მიმდინარეობდა მშვიდ გარემოში, განსაკუთრებული ექსცესების და დარღვევების გარეშე, რაც არის აღიარებული დამკვირვებელი ორგანიზაციების მიერ. ჩვენი პარტიის მიზანია, რომ 8 ოქტომბრის საპარლამენტო არჩევნებმა ჩაიაროს მშვიდ და სამართლიან გარემოში, სადაც ყველა პოლიტიკურ ძალას ექნება შესაძლებლობა, თანაბრად და თავისუფლად გარემოში წარმართოს საარჩევნო კამპანია. ხოლო ამომრჩევლებს ჰქონდეთ შესაძლებლობა მიიღონ ინფორმირებული არჩევანი და თავისუფლად გამოხატონ თავისი ნება 8 ოქტომბერს. სამწუხაროდ, ჩვენი ოპონენტების მიზანი სრულიად საპირისპიროა. ერთიანი ნაციონალური მოძრაობა, რომელიც ერთმნიშვნელოვნად აგებს მომავალ საპარლამენტო არჩევნებს და რომელსაც არ გააჩნია საზოგადოების მხარდაჭერა, მიგვაჩნია რომ ერთადერთ შანსს ხედავს გარკვეული ტიპის არეულობის შექმნაში. რამდენადაც ჩვენთვის ცნობილია, დაგეგმილია სხვადასხვა ტიპის დაპირისპირების პროვოცირება ჩვენს მიერ დაგეგმილ ღონისძიებებზე ან ჩვენს მხარდამჭერ ღონისძიებებზე, ასევე, ორგანიზებული ფორმით დაძაბულობისა და დაპირისპირების შემოტანა წინასაარჩევნო კამპანიის პროცესში."

ქართული ოცნება-დემოკრატიული მოძრაობა ადგილობრივ და საერთაშორისო დამკვირვებლებს თხოვნით მიმართავს, განსაკუთრებული ყურადღება გაამახვილონ ისეთ ფაქტებზე და შემთხვევებზე, რომლებმაც შესაძლოა, არჩევნების მშვიდ გარემოში ჩატარებას ხელი შეუშალოს.

თამარ ჩუგოშვილის განცხადებით ქვეყნისთვის ძალიან მნიშვნელოვანია, რომ მომავალმა საპარლამენტო არჩევნებმა ჩაიაროს მაქსიმალურად მშვიდ ვითარებაში, რაზეც პასუხისმგებლობა ეკისრება არამხოლოდ მმართველ პარტიას, არამედ სხვა პოლიტიკურ ძალებსაც:

„ასევე, მოვუწოდებთ ჩვენს მხარდამჭერებს, არავითარ შემთხვევაში არ გამოიყენონ მსგავსი მეთოდები და არ დაუშვან, რომ მათი მხრიდან მოხდეს გარკვეული დაპირისპირების პროვოცირება, ხოლო იმ შემთხვევაში, თუ სხვა პირების მხრიდან არის პროვოცირება, არ აჰყვნენ ასეთი ტიპის პროვოკაციებს“

ჩუგოშვილმა განაცხადა, რომ კოალიციაში დარწმუნებულები არიან, მიუხედავად სიტუაციის არევის ცალკეული მცდელობებისა, შეძლებენ და ჩაატარებენ ყველაზე სამართლიან და თავისუფალ არჩევნებს საქართველოს დამოუკიდებლობის ისტორიაში.