კომპანია ყაზტრანსგაზ-თბილისის განცხადებით, ვაშლიჯვარში იმ საცხოვრებელ კორპუსში, სადაც აირის გაჟონვის გამო გამოიძახეს გაზის მილები წებოვანი ლენტით იყო გადაბმული. მათი თქმით, გაზი ერთ-ერთ დაკეტილ ბინაში ჟონავდა, რომელშიც შიდა ქსელი კუსტარულად იყო გაყვანილი.

კომპანიაში ამბობენ, რომ ბინაში ბუნებრივი აირის მაღალი კონცენტრაცია იყო. მათი თქმით, კორპუსს შეუწყდა გაზმომარაგება და ევაკუაცია გამოცხადდა. მათივე თქმით, ამ დროისთვის საფრთხე აღარ არსებობს.

16 იანვარს, საღამოს თბილისში, დიდ დიღომში, ავთანდილის ქუჩაზე საცხოვრებელი კორპუსის მეექვსე სართული, სავარაუდოდ, გაზის გაჟონვის შედეგად აფეთქდა. შემთხვევის შედეგად გარდაიცვალა ოთხი ადამიანი, მათ შორის 4 წლის ბავშვია. სხვადასხვა სახის დაზიანება მიიღო რვა ადამიანმა.

აფეთქების დღეს მაცხოვრებლებმა ყაზტრანსგაზის ჯგუფი ორჯერ გამოიძახეს და მათ საფრთხე ვერ აღმოაჩინეს. მომხდარზე შსს-მ ყაზტრანსგაზის ორი თანამშრომელი დააკავა. ისინი ბრალს არ აღიარებენ და აცხადებენ, რომ კორპუსი შეამოწმეს და აპარატმა გაჟონვა არ დააფიქსირა.