თბილისში, ვაშლიჯვარში, სავარაუდოდ, გაზის გაჟონვის გამო მოსახლეობამ საცხოვრებელი კორპუსი დაცალა. როგორც On.ge-ს საგანგებო სიტუაციების სამსახურში განუცხადეს, ადგილზე მაშველები იმყოფებიან, თუმცა ევაკუაცია მათ არ გამოუცხადებიათ და მოსახლეობა კორპუსს უსაფრთხოების მიზნით ცლის.

ყაზტრანსგაზ-თბილისის პრესსამსახურში აცხადებენ, რომ ადგილზე მათი ჯგუფი მუშაობს. პირველადი ინფორმაციით, ბუნებრივი აირი დაკეტილ ბინაში ჟონავს. მათი თქმით, ყაზტრანსგაზის თანამშრომლები აივნიდან ცდილობენ შესვლას და გადამოწმებას.

16 იანვარს, საღამოს თბილისში, დიდ დიღომში, ავთანდილის ქუჩაზე საცხოვრებელი კორპუსის მეექვსე სართული, სავარაუდოდ, გაზის გაჟონვის შედეგად აფეთქდა. შემთხვევის შედეგად გარდაიცვალა ოთხი ადამიანი, მათ შორის 4 წლის ბავშვია. სხვადასხვა სახის დაზიანება მიიღო რვა ადამიანმა.

აფეთქების დღეს მაცხოვრებლებმა ყაზტრანსგაზის ჯგუფი ორჯერ გამოიძახეს და მათ საფრთხე ვერ აღმოაჩინეს. მომხდარზე შსს-მ ყაზტრანსგაზის ორი თანამშრომელი დააკავა. ისინი ბრალს არ აღიარებენ და აცხადებენ, რომ კორპუსი შეამოწმეს და აპარატმა გაჟონვა არ დააფიქსირა.