თბილისის მერია გამოყენებული ნაძვის ხეებისა და ჩიჩილაკების ჩასაბარებელ პუნქტებს გახსნის. ამის შესახებ თბილისის მერმა კახა კალაძემ დედაქალაქის მთავრობის სხდომაზე განაცხადა.

მისი თქმით, გამოყენებულ ნაძვის ხეებს სპეციალურად დაამუშავებენ და სხვადასხვა მიმართულებით გამოიყენებენ.

"ნაძვის ხეებისა და ჩიჩილაკები ნაგვის ურნებში მოხვედრა სერიოზული პრობლემაა. ყველას ინტერესია გავუფრთხილდეთ ბუნებას. თბილისის მერია უახლოეს მომავალში იწყებს კამპანიას გავუფრთხილდეთ ქალაქს და ამ კამპანიის ფარგლებში იწყებს აქციას, რომ ჩავაბაროთ გამოყენებული ჩიჩილაკები და ნაძვის ხეები", — განაცხადა კახა კალაძემ.

მისი თქმით, მოქალაქეებს ნაძვის ხეებისა და ჩიჩილაკების ჩაბარება დედაქალაქის მასშტაბით რამდენიმე სპეციალურ ადგილას შეეძლებათ, მათ შორის ვერის ბაღში, კიკვიძის, ვაკისა და რიყის პარკში.