ქართული ოცნების საარჩევნო შტაბის უფროსმა, ვიცე-პრემიერმა კახა კალაძემ მუხრანში, ადგილობრივ მოსახლეობასთან შეხვედრაზე განაცხადა, რომ ის პირობას აძლევს მოსახლეობას, რომ საქართველოში ვერასდროს დაბრუნდებიან ისეთი ხელისუფლებები, რომლებიც საკუთარ მოქალაქეებზე იძალადებენ. ინფორმაციას ქართული ოცნების პრესსამსახური ავრცელებს:

„ჩვენ ერთად ძალიან რთული გზა გამოვიარეთ ამ 4 წლის განმავლობაში. ძალიან ბევრი მნიშვნელოვანი რეფორმა განვახორციელეთ ერთად. მე ნამდვილად მეამაყება ის, რომ ჩვენს ქვეყანაში დღეს თითოეული მოქალაქის უფლებები არის დაცული. ჩვენი მთავარი მონაპოვარი არის ის, რომ ჩვენი ქვეყნის მოქალაქეებს მივეცით თავისუფლება. დღეს საქართველოში განსხვავებული აზრის გამო ადამიანები არ იდევნებიან; განსხვავებული პოლიტიკური შეხედულებების გამო ადამიანებს ქუჩაში ხელკეტებით არ დასდევენ. მე ნამდვილად მეამაყება ის მშვიდი საარჩევნო გარემო, რომელიც თითოეული ჩვენგანის დამსახურებაა. ჩვენ კარგად გვახსოვს, 2011-12 წლებში, როცა ჩვენ საარჩევნო კამპანიას ვატარებდით, როგორი ზეწოლა იყო. ჩვენდა საუბედუროდ, თითოეულმა ჩვენგანმა ეს საკუთარ თავზე, ოჯახზე, მეგობრებზე, ახლობლებზე გამოვცადეთ, თუმცა საამაყოა ის, რომ ეს ყველაფერი ჩვენ წარსულს ჩავაბარეთ. გაძლევთ პირობას, საქართველოში არასდროს და ვერასდროს დაბრუნდებიან ისეთი ხელისუფლებები, რომლებიც იძალადებენ თავიანთ მოქალაქეებზე და დააშანტაჟებენ მათ“.

კახი კალაძის თქმით, ქართული ოცნების გუნდის გამარჯვებასთან პირდაპირ კავშირშია საქართველოს მოქალაქეების გამარჯვება. მისივე თქმით, ეს სჭირდება ქვეყნის სწორ განვითარებას.

მან წარმატებები უსურვა ქართული ოცნების მაჟორიტარი დეპუტატობის კანდიდატს მცხეთის მუნიციპალიტეტში დიმიტრი ხუნდაძეს. თავის მხრივ, ხუნდაძემ ადგილობრივ მოსახლეობას ის პროექტებიც შეახსენა, რომელიც უახლოეს მომავალში დასრულდება:

"მუხრანში 2 კვირაში იწყება ყველაზე თანამედროვე ბაღის აშენება. იწყება შიდა საუბნო გზების რეაბილიტაცია. წყლის სარეაბილიტაციო სამუშაოები მალე დასრულდება და ვპირდები, რომ ყველა ოჯახში იქნება წყალი, ჯანსაღი ცხოვრების წესი დამკვიდრდება მუხრანში. ვიწყებთ სტადიონების აშენებას”.