საქართველოს პრემიერ მინისტრი, გიორგი კვირიკაშვილი გონიოში, სამხედრო წვრთნების დროს დაკარგული სპეცრაზმელების ოჯახებს სამძიმარს უცხადებს და ამბობს, რომ მიუხედავად იმისა, რომ ბევრი რამ მოსაწესრიგებელია ამ თემით სპეკულირება არასწორია:

"ეს არის ძალიან დიდი ტრაგედია. რა თქმა უნდა, გამოძიებული უნდა იქნას. სამწუხაროდ, ჩვენ ვართ განვითარების იმ საფეხურზე, როდესაც ბევრი რამე არის მოსაწესრიგებელი, მათ შორის, დარწმუნებული ვარ, ნორმატიული ბაზაც მოსაწესრიგებელია სამხედროების წვრთნის კუთხით, მაგრამ ყველაფერი ერთბაშად ვერ მოხდება".

კვირიკაშვილის თქმით, სამძებრო სამუშაოები ადგილობრივი ძალებით გაგრძელდება:

"ძიება შეწყვიტა თურქულმა გემმა, რომელიც იყო ჩამოსული, ვინაიდან, მათი შეხედულებით, ამოწურეს იმ მომენტში შესაძლებლობები. ჩვენ უნდა გავაგრძელოთ ძებნა, მაქსიმალური ძალისხმევა გავწიოთ იმისათვის, რომ ვიპოვოთ დაღუპული სამხედროები".

20 აგვისტოს თურქული ხომალდი სამძებრო სამუშაოებში ჩაერთო, თუმცა თავდაცვის სამინისტროს განცხადებით, 11 დღიანი სამუშაოების შემდეგ თურქულმა მხარემ ძებნის ოპერაციის შეჩერების გადაწყვეტილება მიიღო.

16 აგვისტოს გონიოს ყოფილი სასროლეთის ტერიტორიაზე, შავ ზღვაში მიმდინარე წვრთნის დროს, ორი სამხედრო მოსამსახურე - კაპრალი იაგო შარაძე და I კლასის რიგითი გიორგი ნანეტაშვილი დაიკარგნენ.