ქართული ოცნების წევრის, გედევან ფოფხაძის თქმით, ბიძინა ივანიშვილის განცხადებით ვერ გაეცა პასუხი მთავარ კითხვას: უჭერს თუ არა მხარს ის უზენაესი სასამართლოს მოსამართლეობის კანდიდატებს. დეპუტატი ამბობს, რომ აინტერესებს პარტიის ლიდერი ლოიალურია თუ არა ამ სიის მიმართ.

"ჩემი გუნდი არის ის, ვინც ციხეში სანთლით ხელში ლოცულობდნენ ჩვენი გამარჯვებისთვის და ღამეს ათევდნენ საარჩევნო უბნებთან. მე ამ გუნდს არ ვუღალატებ. პრინციპები და ღირებულებები ჩვენ იმ ადამიანებთან არ შეგვიცვლია, არასდროს იქნება მისაღები [მიხეილ სააკაშვილის] ზონდერ მოსამართლეები", — ამბობს ფოფხაძე.

მისი თქმით, გუნდურობა გამოიხატება იმ პრინციპების ერთგულებით, რომლითაც 2012 წელს არჩევნები მოიგეს. ქართული ოცნების დამფუძნებლის, ბიძინა ივანიშვილის თქმით, ეკა ბესელია იურიდიულ საკითხთა კომიტეტის თავმჯდომარის თანამდებობიდან გადადგომის შემდეგ პარტიის პრინციპების წინააღმდეგ წავიდა.

ივანიშვილის თქმით, ბესელიამ ვიცე-სპიკერად დანიშვნის შეთავაზება არასწორად დაუკავშირა უზენაესი სასამართლოს მოსამართლეების არჩევის პროცესს. პარტიის თავმჯდომარის განმარტებით, პარლამენტის თავმჯდომარის მოადგილედ ეკა ბესელიას არჩევის საკითხი დღის წესირგიდან მოიხსნა.