პარლამენტთან ცხოველების სასტიკი მოპყრობის წინააღმდეგ 10 იანვარს საპროტესტო აქცია გაიმართება. აქციას წინ უძღვოდა 8 იანვრის შემთხვევა, როდესაც თბილისში, ბელიაშვილის ქუჩაზე ტომარაში გახვეული ძაღლი იპოვეს, რომელსაც მძიმე დაზიანებები ჰქონდა. აღნიშნულ საქმეზე შინაგან საქმეთა სამინისტრომ გამოძიება ცხოველებისადმი სასტიკი მოპყრობის მუხლით დაიწყო.

"ჩვენ ცხოველთა მოყვარულები, ცხოველთა დამცველები და უბრალოდ ადამიანები, რომლებიც ვერასდროს ვერ შევეგუებით და ვერ გავიგებთ ამ უსამართლობას და ამ ძალადობას, ვერთიანდებით ერთად ჩვენი ოთხფეხა მეგობრისთვის", — ნათქვამია ღონისძიების აღწერაში.

აქციის ორგანიზატორები ამბობენ, რომ აქციებს გამართავენ მანამ, სანამ არ გამკაცრდება კანონი და არ დაისჯებიან დამნაშავეები. მათივე თქმით, ცხოველებისათვის უნდა შეიქმნას უსაფრთხო გარემო. გარდა ამისა, ისინი მოითხოვენ, რომ სახელმწიფო დაეხმაროს ყველას, ვინც ცხოველს შეიფარებს და ყველა უბანში თბილი სახლები დაიდგას.