საქართველოს ევანგელურ-ბაპტისტური ეკლესია და ქართველ მუსლიმთა კავშირი უკრაინის ეკლესიას ავტოკეფალიას ულოცავენ. ამის შესახებ ბაპტისტური ეკლესიის წინამძღოლმა და მუსლიმთა კავშირის თავმჯდომარემ ფეისბუქგვერდზე დაპოსტეს.

"გამარჯვებისთვის განვლილი ეს დიდი ბრძოლის გზა იყო თავისუფალი და ღირსეული ერის სრული გამოვლინება. ამავე დროს უკრაინის მართლმადიდებელი ეკლესიის ავტოკეფალია მსოფლიო ქრისტიანული სამყაროსთვის წარმატებული, ახალი და მნიშვნელოვანი რეალობაა", — წერს მუსლიმთა კავშირის თავმჯდომარე ტარიელ ნაკაიძე, რომელიც მილოცვას ქართველ მუსლიმთა სახელით ავრცელებს.

ავტოკეფალიის მინიჭების მისალოც წერილში ევანგელურ-ბაპტისტური ეკლესიის მეუფე მალხაზ სონღულაშვილი წერს, რომ უკრაინის ეკლესიის დამოუკიდებლობა ახალ რელიგიურ რეალობას ქმნის არა მარტო უკრაინაში, არამედ მთელ ევროპაში.

"თქვენთან ერთად ვულოცავ ამ გამარჯვებას, არა მარტო უკრაინელ მართლმადიდებლებს, არამედ ყველა ადამიანს, ვისთვისაც ძვირფასია უკრაინის აწმყო და მომავალი", — წერს მეუფე.

უკრაინის ეკლესიისთვის ავტოკეფალია ჯერ არ მიულოცავს საქართველოს მართლმადიდებელ ეკლესიას და საქართველოს მთავრობას. საპატრიარქოში აცხადებენ, რომ უკრაინის ავტოკეფალიის საკითხზე სინოდის მომდევნო სხდომაზე იმსჯელებენ და მას შედეგ, რაც ტომოსს წაიკითხავენ პოზიციასაც დააფიქსირებენ.

მმართველი პარტიის წევრები კი ამბობენ, რომ მთავრობა პოზიციას საპატრიარქოზე ადრე ვერ დააფიქსირებს, რადგან ეს არასწორი იქნება.