იაშვილის სახელობის ბავშვთა ცენტრალური საავადმყოფოს დირექტორის მოადგილე, ივანე ჩხაიძე აცხადებს, რომ გრიპის შემთხვევაში ყველაზე ეფექტური რჩევა ვაქცინაციაა. მიუხედავად იმისა, რომ ვაქცინის გასაკეთებლად იდეალური პერიოდი ოქტომბერ-ნოემბერია, ივანე ჩხაიძე ამბობს, რომ არც ახლაა გვიან.

"ჩვენ მაინც ველოდებით გრიპის შემთხვევების მატების მეორე ტალღას თებერვალსა და მარტში და თუ ვინმეს არ ჩაუტარებია გრიპის ვაქცინაცია იანვრის დასაწყისი, არ არის გვიან", — განმარტა ჩხაიძემ ტელეკომპანია პირველის ეთერში.

იაშვილის კლინიკის დირექტორის მოადგილის თქმით, ხშირად, მკურნალობას არაპროფესიონალების არასწორი რჩევები ართულებს. ივანე ჩხაიძე ურჩევს მშობლებს არ დაუჯერონ ექიმებს, რომლებიც გრიპის პირველივე ნიშნებზე ანტიბიოტიკის დალევას ურჩევენ პაციენტს და ან იმ პირებს, რომლებიც წყალბადის ზეჟანგის "განსაკუთრებულ თვისებებზე" წერენ.

"ყველა ეს რჩევა არის არასწორი და ყველა ამ რჩევამ შესაძლოა გაართულოს მდგომარეობა და მოგვიანებით მიმართვიანობა განაპირობოს. არ დაიწყოთ სახლში მკურნალობა, რომელმაც შესაძლოა გადაწიოს მიმართვიანობა", — ამბობს ექიმი.

დაავადებათა კონტროლის ცენტრის ხელმძღვანელის, ამირან გამყრელიძის განცხადებით, იანვრის პირველ კვირაში გრიპის შემთხვევების კლების დინამიკაა. თუ დეკემბრის ბოლო კვირაში გრიპით ავადობის მაჩვენებელი 277 იყო ყოველ 1000 მოსახლეზე, იანვრის პირველ კვირაში ეს მაჩვენებელი 256-ია.

ბოლო მონაცემებით, H1N1 ვირუსით, იგივე ღორის გრიპით 10 ადამიანი გარდაიცვალა. გაზრდილი მოთხოვნის გამო ანტივირუსულ პრეპარატ ტამიფლუს დეფიციტი შეიქმნა. ჯანდაცვის სამინისტრომ აფთიაქებს მედიკამენტის დამატებითი მარაგი გადასცა. ტამიფლუ ოთხ სააფთიაქო ქსელში გაიყიდება: PSP, ავერსი, GPS და ფარმადეპო.

პრეპარატს უფასოდ მიიღებენ ორსულები, სოციალურად დაუცველები, ბავშვები, ასაკით პენსიონერები, გულსისხლძარღვთა, დიაბეტით, ონკოლოგიური და სასუნთქი სისტემის დაავადებების მქონე მოქალაქეები. პრეპარატის უფასოდ მისაღებად საჭიროა, ბენეფიციარებმა მიაკითხონ მუნიციპალურ საზოგადოებრივი ჯანდაცვის ცენტრებს და წარადგინონ ექიმის დანიშნულება (ფორმა 100).

კონკრეტულად აფთიაქის რომელ ფილიალებში იყიდება პრეპარატი, მოქალაქეებმა ჯანდაცვის სამინისტროს (1505) ან აფთიაქის ცხელ ხაზზე უნდა დარეკონ:

PSP — (032) 2 40 20 20;
ავერსი — (032) 2 90 08 00;
GPS — (032) 271 0707;
ფარმადეპო — (032) 2 40 00 04.

რეკომენდაციები გრიპთან საბრძოლველად წაიკითხეთ აქ.

ამავე თემაზე: