გრიპის საწინააღმდეგო პრეპარატი ტამიფლუ ოთხ სააფთიაქო ქსელში გაიყიდება — პსპ, ავერსი, ჯიპისი და ფარმადეპო. როგორც On.ge-ს ჯანდაცვის სამინისტროს პრესსამსახურმა უთხრა, სამინისტრომ აფთიაქებს მედიკამენტის 800 კოლოფი გადასცა.

პრეპარატზე გაზრდილი მოთხოვნის გამო აფთიაქებში ტამიფლუს დეფიციტი შეიქმნა. 5 იანვარს სამინისტრომ გააფართოვა იმ რისკ ჯგუფების რიცხვი, რომლებზეც სამინისტრო უფასოდ გასცემს ამ მედიკამენტს.

ჯანდაცვის მინისტრის, დავით სერგეენკოს თქმით, პრეპარატს უფასოდ მიიღებენ ორსულები, სოციალურად დაუცველები, ბავშვები, ასაკით პენსიონრები და ქრონიკული დაავადების მქონე პირები. მათ შეუძლიათ მიმართონ საზოგადოებრივი ჯანდაცვის განყოფილებებს მთელი საქართველოს მასშტაბით

ინფორმაციას, თუ რომელ აფთიაქში იქნება, შეგიძლიათ მიიღოთ ჯანდაცვის სამინისტროს ცხელი ხაზიდან — 15 05.

H1N1 ვირუსით, ანუ ე.წ. ღორის გრიპით, 4 იანვრის მონაცემებით, 8 ადამიანი გარდაიცვალა.