ჩრდილოეთ კორეის ლიდერი, კიმ ჩენ ინი ჩინეთის პრეზიდენტთან, სი ძინპინთან შესახვედრად პეკინში კიდევ ერთხელ ჩავიდა. როგორც BBC წერს, კიმ ჩენ ინის ოფიციალური ვიზიტი 10 იანვრამდე გაგრძელდება, თუმცა რაზე ისაუბრებენ ისინი ჯერჯერობით უცნობია.

პეკინში ოფიციალური ვიზიტის პარალელურად ფხენიანი და ვაშინგტონი დონალდ ტრამპისა და კიმ ჩენ ინის მორიგ შეხვედრაზე მოლაპარაკებებს ატარებენ.

ფხენიანის ლიდერი ჩინეთში მეოთხედ ჩავიდა. წინა სამიტების მსგავსად მიმდინარე შეხვედრაც მედიისთვის მოულოდნელი იყო. ლიდერების პირველი შეხვედრა გასული წლის მარტში ჩატარდა და კორეის ნახევარკუნძულის ბირთვულ განიარაღებაზე შეთანხმდნენ.

კიმ ჩენ ინი თავის ცოლთან ერთად პეკინში 7 იანვარს სპეციალური მატარებლით ჩავიდა. როგორც სხვადასხვა გამოცემა იუწყება, ეს იგივე ბრონირებული მატარებელია, რომელსაც კიმ ჩენ ინის მამა, კიმ ჩენ ირი ჩინეთსა და რუსეთში ვიზიტების დროს იყენებდა.

ჩრდილოეთ კორეის ლიდერის ჩასვლის გამო ათობით სამართალდამცავმა რკინიგზის გარშემო გზა გადაკეტა. გარდა ამისა, გზები გადაიკეტა სასაზღვრო ქალაქ დანდონგთან.

ფოტო: Jason Lee / Reuters