"ყოველ ეპოქას თავისი ჰეროდე ჰყავს", — ეს სიტყვები საქართველოს პატრიარქის 2019 წლის საშობაო ეპისტოლეშია ნათქვამი.

ამავე ეპისტოლეში პატრიარქი წერს, რომ ღმერთის ნებით, საზოგადოება მოგვთა მსგავსად უნდა ამაღლდეს "გულისხმისყოფისა და სრულყოფის კიბეზე". პატრიარქს აზრით, თუ ასე არ მოხდება ადამიანები ჰეროდე მეფის მზაკვრობასა და ბრძანებას დაემონებიან, რომელმაც "14 000 ყრმა მოაკვლევინა იმ იმედით, რომ მათ შორის მოაკვდინებდა ახლადშობილ ძეს ღვთისას (მასში მომავალ მეფეს და მეტოქეს ხედავდა) და ამით თავის ამქვეყნიურ მეფობას გაიხანგრძლივებდა".

"საუკუნეთა მანძილზე უფლამდე მისასვლელი გზა მუდამ ნარ-ეკლიანი იყო, ვიწრო და ძნელად სავალი, რადგან ყოველ ეპოქას თავისი ჰეროდე ჰყავს, რომელიც ძალაუფლების შესანარჩუნებლად არ ერიდება ბოროტ, ბილწ საქმეთ, არ ერიდება არც უდანაშაულო ყრმათა მოწყვეტას, ოღონდ ადამიანები თავის მონობაში ამყოფოს და შემოქმედი დაავიწყოს", — ნათქვამია პატრიარქის ეპისტოლეში.

ამავე ტექსტში ნათქვამია, რომ "ჰეროდეს მზაკვრობა" თანამედროვე დროში სხვადასხვა სახით ვლინდება.

"აბორტით მოწყვეტილ ჩვილთა სისხლი ცას შეჰღაღადებს, ნარკომანია, აზარტული თამაშები თუ უზნეო ცხოვრების წესი ათასობით ახალგაზრდას იწირავს და ეს დანაშაულებანი ჩვენგან პასუხს ითხოვს. ჰეროდესეული სული იმასაც ცდილობს, ისეთი გარემო დაამკვიდროს, სადაც მისაბაძი აღარ იქნება სხვისთვის არა თუ თავის გაწირვა, ნაცვალგების გარეშე სიკეთის ქმნაც კი; მისაბაძი აღარ იქნება ზნეობრიობა და სიწმინდე და ადამიანებს დახშული ექნებათ სინდისის ხმა",— ნათქვამია პატრიარქის 2019 წლის ეპისტოლეში.