ქართული ოცნების წევრი, გედევან ფოფხაძე ამბობს, რომ ის არ აპირებს უზენაესი სასამართლოს მოსამართლეების დამტკიცების საკითხში თავისი პოზიციის შეცვლას. მისი თქმით, ის ქვეყნის მომავალს არ დათმობს. ამის შესახებ მან პალიტრანიუსის ეთერში განაცხადა.

"ჩემთვის წითელი ხაზი არის მართლმსაჯულება. სადამდეც მიმიყვანენ [ქართული ოცნების წევრები], იქამდე მივალ. რა პირობებშიც ჩამაყენებენ, იმ პირობებში გავაგრძელებ ბრძოლას", — განაცხადა ფოფხაძემ.

მისი თქმით, ამ საკითხზე თავის თანაგუნდელ ეკა ბესელიასთან ექვსი წლის წინ შეთანხმდა, როცა ის გაიცნო.

"მე იმის მერე არასდროს ეკასთვის არ მიღალატია, არც ეკას ჩემთვის. ამ საკითხთან დაკავშირებით ჩემს მეგობარს ნამდვილად არ ვაკადრებ, რომ კიდევ გადავამოწმო მისი პოზიცია. ეკა ბესელია ბოლომდე იბრძოლებს იმისთვის, რისიც სწამს, რაც არ უნდა დააბრალონ და რაც არ უნდა შავი PR აუგორონ", — თქვა ფოფხაძემ.

დღეს, 3 დეკემბერს ფოფხაძეს ქართული ოცნების ფრაქციამ იურიდიულ საკითხთა კომიტეტი დაატოვებინა და შესაბამისად, ის აღარ არის კომიტეტის თავმჯდომარის პირველი მოადგილე. პარლამენტის თავმჯდომარის, ირაკლი კობახიძის თქმით, მისი არჩევით რეგლამენტი და გუნდურობის პრინციპი დაირღვა. ეკა ბესელია, რომელიც ამ კომიტეტს გადადგომამდე ხელმძღვანელობდა, ამბობს, რომ ეს ფოფხაძის კომიტეტიდან გამოთხოვით მის მიმართ უმრავლესობამ სადამსჯელო ღონისძიება გაატარა. ოცნებაში დაპირისპირება სწორედ ბესელიას მიერ თანამდებობის დატოვების შემდეგ დაიწყო.

დაპირისპირება ქართულ ოცნებაში

იურიდიულ საკითხთა კომიტეტის თავმჯდომარე, ეკა ბესელია თანამდებობიდან 27 დეკემბერს გადადგა. მისი თქმით, ამით უზენაესი სასამართლოს მოსამართლეების დამტკიცებას შეუშალა ხელი.

იუსტიციის უმაღლესმა საბჭომ უზენაესი სასამართლოს მოსამართლეობის 10 კანდიდატი წარადგინა. ამის მიუხედავად, დღემდე არ არსებობს პროცედურა, რომლითაც იუსტიციის უმაღლესმა საბჭომ მოსამართლეობის კანდიდატები უნდა წარადგინოს. ამ მიზეზით, არასამთავრობო ორგანიზაციების ნაწილსა და საბჭოს არამოსამართლე წევრებს პროცესის ობიექტურობასა და მიუკერძოებლობაზე კითხვები უჩნდებათ.

ეკა ბესელიას გადადგომას მმართველ გუნდში დაპირისპირება მოჰყვა. პარლამენტის თავმჯდომარის, ირაკლი კობახიძის თქმით, ბესელიას გადადგომის მიზეზები პარტიის შიდა სამზარეულოა, რომელსაც ნაწილობრივ გარეთ გამოიტანეს.

იურიდიულ საკითხთა კომიტეტის პირველ მოადგილედ გედევან ფოფხაძე 31 დეკემბერს აირჩიეს. საქართველოს პარლამენტის თავმჯდომარე ფიქროს, რომ მისი არჩევა რეგლამენტის დარღვევით მოხდა. ეკა ბესელიას თქმით, რეგლამენტს კარგად იცნობს და იმოქმედა წესების შესაბამისად.

ამასთანავე, პარლამენტის თავმჯდომარემ განაცხადა, რომ თუ ვინმე წავა ქართული ოცნების გუნდის წინააღმდეგ, ამას პასუხი აუცილებლად გაეცემა.