იუსტიციის საბჭოს არამოსამართლე წევრმა, ანა დოლიძემ ლევან მურუსიძის უვადო მოსამართლედ დანიშვნას სამარცხვინო გადაწყვეტილება უწოდა და საქართველოს მოსახლეობას მიუსამძიმრა.

"იუსტიციის საბჭო ყოველდღე გვანცვიფრებს კიდევ და კიდევ უფრო სამარცხვინო გადაწყვეტილებებით და სად მივალთ ბოლოში არ ვიცი, სად აღმოვჩნდებით. ლევან მურუსიძე აღმოჩნდა მის [საბჭოს] თვალში ყველანაირი პროცედურის და კანონის დარღვევით კეთილსინდისიერი მოსამართლე, — განაცხადა დოლიძემ.

დოლიძის თქმით, მიუხედავად იმისა, რომ მურუსიძე უვადო მოსამართლედ დაინიშნა "ის სასამართლოში იპარპაშებს მანამ, სანამ საქართველოში იპარპაშებს, აი, ეს [მურუსიძე-ჩინჩლაძის] ჯგუფი".

ლევან მურუსიძე უვადო მოსამართლეთ იუსტიციის უმაღლესმა საბჭომ 11 ხმით აირჩია. მასთან ერთად უვადო მოსამართლედ დანიშნეს ნუნუ ნემსიწვერიძე, პაატა ნოზაძე, ვალერიან ფილიშვილი, პაატა ფხალაძე და ნანა ჯოხაძე.

ლევან მურუსიძე არაერთ გახმაურებულ საქმესთან არის დაკავშირებული, როგორც წინა ხელისუფლების დროს, ისე ახლა. ნაციონალური მოძრაობის მმართველობის დროს მან განიხილა სანდრო გირგვლიანის მკვლელობის საქმე. მისი გადაწყვეტილებით გირგვლიანის მკვლელობაში ბრალდებულებს სასჯელები შეუმცირდათ. მოქმედი ხელისუფლების დროს კი მურუსიძემ განიხილა აიისას საქმე.

დღეს, 27 დეკემბერს უმაღლესი საბჭოს სხდომაზე შესვლის წინ მურუსიძემ განაცხადა, რომ სურს გირგვლიანის საქმეზე ყველა კითხვას უპასუხოს როგორც უმაღლეს საბჭოსთან, ასევე ნებისმიერი ტელევიზიის პირდაპირ ეთერში. მისი თქმით, ორი წლის განმავლობაში პოლიტიკური პარტიები გირგვლიანის საქმეზე მას აწმენდნენ ხელს.

მურუსიძემ აღნიშნა ისიც, რომ მზად არის სისხლის სამართლის პროცესის მცოდნე ნებისმიერ ადამიანთან განიხილოს გირგვლიანის საქმე. მისი მტკიცებით, იმ პირობებში, რაშიც თვითონ მოუწია მუშაობა სხვა დასკვნას ვერავინ გამოიტანდა.