"ახლა გავიგე, რატომ გავიდა სალომე სამადაშვილი იურიდიული კომიტეტიდან, რადგან კომიტეტის თავმჯდომარე არ აძლევს საუბრის უფლებას რიგის მიხედვით", — ამ სიტყვებით დაიწყო საპარლამენტო უმრავლესობის წევრმა სოფო კილაძემ იურიდიულ საკითხთა კომიტეტის სხდომაზე გამოსვლა.

მის ამ განცხადებას წინ უძღოდა სოფო კილაძესა და ეკა ბესელიას შორის მცირე კამათი. სოფო კილაძე ითხოვდა, სიტყვა მიეცათ მისთვის, რაზეც ბესელიამ დამშვიდებისკენ მოუწოდა.

სოფიო კილაძის კრიტიკას ეკა ბესელიას რეპლიკა მოჰყვა: "თქვენ და სალომე სამადაშვილი რომ ერთ პოზიციაზე ხართ, მე ეს ძალიან მახარებს".

სოფო კილაძემ პასუხად თქვა, რომ ადამიანის უფლებათა კომიტეტზე განსხვავებული აზრის მიუხედავად სიტყვის უფლება ყველას შეუძლია.

"თქვენ თუ მასწავლით ადამიანის უფლებებს დაიქცა ეს ქვეყანა", — უპასუხა ეკა ბესელიამ.

როგორც სოფო კილაძემ აღნიშნა, ეკა ბესელიას თანამდებობიდან წასვლის თემაზე, ჯერ კიდევ ორი-სამი თვის წინ საუბრობდნენ ჟურნალისტები.

"შეგიძლიათ, დასერჩოთ "გუგლში" და პირდაპირ ამოაგდებს ჟურნალისტების სტატიებს, სადაც ამაზე იყო საუბარი. რატომ ხდება ამ საკითხის დაკავშირება მოსამართლეების თემასთან, ეს ყოვლად გაუგებარია. გაუგებარი კი არა გასაგები თემაა. ძალიან ნათელია ამ კონკრეტული თემების უკან, რაც დგას",— აღნიშნა სოფო კილაძემ.

სოფო კილაძის განცხადებას ეკა ბესელიამ უპასუხა და დეპუტატების ნაწილს პასუხისმგებლობის გააზრებისკენ მოუწოდა.

"რაც ადრე ცხადდებოდა და რაც ადრე გაჟღერდა ხომ არ არის ეს დაკავშირებული აი, ამ პროცესთან, ამაზე ცოტა მოგვიანებით ვილაპარაკებ. ეს, როგორც ჩანს, ადრე იგეგმებოდა, რატომ იგეგმებოდა ეს ადრე იქამდეც მივალთ და მერე ვიღაც არ აღმოჩნდეს კიდევ უხერხულ მდგომარეობაში. ყველას ვურჩევ, ვინც დაკავებულია და დაკავებულია იმ პოზიციით, რომ ვერ გაუგია, სად არის და რატომ არის, ცოტა გაიაზროს პასუხისმგებლობა და ისე ილაპარაკოს, რადგან იმ ზონაში შევა, სადაც თავად დაიკარგება და ვეღარ გამოაგნებს გზას", — განაცხადა ეკა ბესელიამ.

დღეს, 27 დეკემბერს იურიდიულ საკითხთა კომიტეტის თავმჯდომარე, ეკა ბესელია გადადგა. მისი თქმით, ამით უზენაესი სასამართლოს მოსამართლეების დამტკიცებას შეუშალა ხელი. მისი განმარტებით, ის მას შემდეგ გადადგა, რაც მისმა მოადგილემ, ვანო ზარდიაშვილმა თანამდებობების დატოვების მოთხოვნით მიმართა. ბესელიას გადადგომის შემდეგ ზარდიაშვილს მოუწევდა ამ თანამდებობაზე მუშაობა.

იუსტიციის უმაღლესმა საბჭომ უზენაესი სასამართლოს მოსამართლეობის 10 კანდიდატი წარადგინა. ამის მიუხედავად, დღემდე არ არსებობს პროცედურა, რომლითაც იუსტიციის უმაღლესმა საბჭომ მოსამართლეობის კანდიდატები უნდა წარადგინოს. ამ მიზეზით, არასამთავრობო ორგანიზაციების ნაწილსა და საბჭოს არამოსამართლე წევრებს პროცესის ობიექტურობასა და მიუკერძოებლობაზე კითხვები უჩნდებათ.

დასახელებულ კანდიდატებს შორის არიან: თამარ ალანია; მერაბ გაბინაშვილი; დიმიტრი გვრიტიშვილი; გიორგი მიქაუტაძე; ნინო სანდოძე; პაატა სილაგაზე; გიორგი ტყავაძე; ნინო ქადაგიძე; მიხეილ ჩინჩალაძე; მარიამ ცისკაძე.

იუსტიციის საბჭოს არამოსამართლე წევრი, ნაზი ჯანეზაშვილი და არასამთავრობო სექტორის ნაწილი მათ "ჩინჩალაძის კლანად" მოიხსენიებს.

ამავე თემაზე: სასამართლოს სუიციდად შეფასებული გადაწყვეტილება და უვადო მოსამართლეობის 10 კანდიდატი