ბიბლუსი გალერეას ერთ-ერთი კონსულტანტის გათავისუფლების ბრძანება თბილისის საქალაქო სასამართლომ უკანონოდ ცნო. სარეზოლუციო ნაწილი მოსამართლემ დღეს, 25 დეკემბერს გამოაცხადა. ამის შესახებ On.ge-ს EMC-ის იურისტმა, ლელა გვიშიანმა განუცხადა, რომელიც კონსულტანტის ინტერესებს იცავდა.

მისი თქმით, სასარჩელო მოთხოვნა ნაწილობრივ დაკმაყოფილდა — ბიბლუსს დაეკისრა კონსულტანტისთვის განაცდურის ანაზღაურება და დაკმაყოფილდა მოთხოვნა სამსახურში აღდგენაზე. სასამართლომ არ დააკმაყოფილა ზეგანაკვეთური შრომის ანაზღაურება.

მისი თქმით, საქმე ეხება კამპანიას, რომელიც ბიბლუსის თანამშრომლებმა დაიწყეს "უკეთესი შრომის პირობების" მოთხოვნით.

"რეზულტატი არის ის, რომ გათავისუფლების ბრძანება, რასაც შემდეგ მოჰყვა უფლებების დარღვევა, ამ ნაწილში ჩვენი არგუმენტები გაიზიარა სასამართლომ და მიიჩნია, რომ უკანონო იყო", — ამბობს ლელა გვიშიანი.

8 თებერვალს, სტუდენტური მოძრაობა აუდიტორია 115-ის ფეისბუქ გვერდზე ბიბლუსი გალერის თანამშრომლების განცხადება გავრცელდა. ვიდეომიმართვაში ისინი არასათანადო სამუშაო პირობებზე და მათი შრომითი უფლებების დარღვევაზე საუბრობენ.

15 თებერვალს ბიბლუს გალერის ფილიალიდან გაათავისუფლეს ორი თანამშრომელი, რომელიც ვიდეო მიმართვაში სხვა ოთხ დასაქმებულთან ერთად ფიგურირებდა. მათ მხარდასაჭერად ამავე ფილიალში აუდიტორია 115-იც იმყოფებოდა.