სახელმწიფო უსაფრთხოების სამსახურის თანამშრომლებმა ზუგდიდის ყოფილი მერის, ლაშა გოგიასა და ვიცე-მერის, გია გულორდავას დანაშაულის შეუტყობინებლობის ბრალდებით, მერიის ეკონომიკური პოლიტიკისა სამსახურის უფროსი, თენგიზ ქობალია დააკავეს. ასევე, ცრუ ჩვენების მიცემის ბრალდებით დაკავებულია მოქალაქე ხუტა ბ.

გამოძიების ვერსიით, თენგიზ ქობალიამ ზუგდიდის მერის, ლაშა გოგიას და ვიცე-მერის გია გულორდავას დანაშაულის ჩადენის ფაქტი შეიტყო და სამართალდამცავ ორგანოებს არ შეატყობინა, ხოლო მოქალაქე ხუტა ბ-მ იმისათვის, რომ არ ემხილებინა გია გულორდავა გამოძიებას განზრახ არასწორი ინფორმაცია მიაწოდა.

გამოძიება დანაშაულის შეუტყობინებლობისა და ცრუ ჩვენების მიცემის ფაქტებზე მიმდინარეობს (საქართველოს სსკ-ის 376-ე მუხლით და 370-ე მუხლის მე-3 ნაწილით, რაც სასჯელის სახით ითვალისწინებს თავისუფლების აღკვეთას 3-დან 7 წლამდე ვადით).

ზუგდიდის ყოფილი მერი, ლაშა გოგია და მერის ყოფილი მოადგილე, გია გულორდავა ჯგუფურად, განსაკუთრებით დიდი ოდენობით ქრთამის აღების ბრალდებით პირველ ნოემბერს დააკავეს. მათ თბილისის საქალაქო სასამართლომ აღკვეთის ღონისძიებად პატიმრობა შეუფარდა.