განახლება: ავთანდილ ცქვიტინიძის ფეისბუქის კედელზე აღნიშნული პოსტი ამ დროისთვის მიუწვდომელია.

საქართველოში მოღვაწე დიზაინერი ავთანდილ ცქვიტინიძე ბალენსიაგას კრეატიულ დირექტორს, დემნა გვასალიას, პლაგიატში ადანაშაულებს.

საუბარია ბალენსიაგას 2019 წლის გაზაფხული-ზაფხულის სეზონზე წარდგენილ კაბაზე, რომელიც ცოტა ხნის წინ მიშელ ობამას ეცვა. ავთანდილ ცქვიტინიძე მას 2017 წელს შექმნილ საკუთარ კაბას ადარებს.

ცქვიტინიძემ ფეისბუქზე საკუთარი ნამუშევრისა და ბალენსიაგას ბრენდის კაბის ფოტოები გამოაქვეყნა, წარწერით:

"ისადა, ვინც ჩემთან ვერ მოასწარით შეძენა ამ კაბის [2017], შეგიძლიათ ბალენსიაგაში შეირბინოთ, ამ ზაფხულს მე ყვითელის გაკეთებას არ ვგეგმავ".

ბალენსიაგას მიერ შექმნილი კაბა ჯერ გაყიდვაში არ ჩაშვებულა და მისი ფასი უცნობია. ის ექსკლუზიურად ეცვა ამერიკის ყოფილ პირველ ლედის, მიშელ ობამას. ცქვიტინიძის მიერ შექმნილი წითელი კაბის ფასი 270 ლარია.