სასტუმრო ლეოგრანდში გაჩენილ ხანძარზე, რომელმაც 11 ადამიანის სიცოცხლე იმსხვერპლა პასუხისმგებლობა 2 პირს დაეკისრა. ბათუმის საქალაქო სასამართლოს გადაწყვეტილებით, პატიმრობა მიესაჯა ტექნიკური უსაფრთხოების სამსახურის მენეჯერს და ობიექტის საწყობის ხელმძღვანელს.

როგორც On.ge-ს ბათუმის საქალაქო სასამართლოში განუცხადეს, ტექნიკური უსაფრთხოების სამსახურის მენეჯერს ფატიჰ იავუზს, შეეფარდა თავისუფლების აღკვეთა 5 წლითა და 6 თვის ვადით. აჭარის ტელევიზიის ინფორმაციით, მოსამართლემ ფატიჰ იავუზს უთხრა, რომ მეტ სასჯელს იმსახურებდა, მაგრამ პროკურატურის მტკიცებულებს აღიარებდა და ამ ფაქტის გათვალისწინება უწევდა.

რაც შეეხება მეორე დაკავებულს, ობიექტის საწყობის ხელმძღვანელ გიორგი მიქელაძეს სამსახურეობრივი გულგრილობის გამოჩენის გამო მას 2-წლიანი პატიმრობა მიესაჯა.

2017 წლის 24 ნოემბრის ღამეს, სასტუმრო ლეოგრანდში გაჩენილი ხანძრის შედეგად, 11 ადამიანი დაიღუპა. მათ შორის, 10 საქართველოს, ხოლო ერთი ირანის მოქალაქე. მაშველებმა და პოლიციელებმა სასტუმროს შენობიდან ასზე მეტი ადამიანის ევაკუაცია შეძლეს. 20-მდე ადამიანი სხვადასხვა სირთულის ინტოქსიკაციის გამო, ბათუმის კლინიკებში გადაიყვანეს. ტრაგედიის შემდეგ სასტუმრო ლეოგრანდმა ფუნქციონირება ველმონდის სახელწოდებით გააგრძელა.