ამერიკის შეერთებული შტატების თავდაცვის მდივანი, ჯიმ მატისი თანამდებობას ტოვებს. ის პოსტიდან თებერვლის ბოლოს გადადგება.

მატისმა დონალდ ტრამპს ოფიციალური წერილით მიმართა, სადაც წერს, რომ რიგ საკითხებზე მისი და ტრამპის პოლიტიკური შეხედულებები ერთმანეთისგან მკვეთრად განსხვავდება. მისივე თქმით, პრეზიდენტს აქვს უფლება ჰყავდეს თავდაცვის მინისტრი, რომელიც მის შეხედულებებს უკეთესად იზიარებს.

უცხოური მედიის ინფორმაციით, თავდაცვის მინისტრის გადადგომა სირიიდან ამერიკის ჯარების გაყვანის შესახებ განცხადებამ განაპირობა.

დონალდ ტრამპმა ტვიტერზე დაწერა, რომ ჯიმ მატისის შემცვლელს უახლოეს მომავალში დაასახელებს.

აშშ-მ სირიიდან ჯარის გაყვანის შესახებ გადაწყვეტილება 20 დეკემბერს მიიღო. BBC-ის ცნობით, პრეზიდენტმა ტრამპმა ამის მიზეზად სირიაში, ტერორისტული დაჯგუფება ე.წ. ისლამური სახელმწიფოს დამარცხება დაასახელა.