ქართული ოცნების დეპუტატი, დიმიტრი ცქიტიშვილი აცხადებს, რომ პრეზიდენტის საპარლამენტო მდივნის პოსტზე დიმიტრი გაბუნიას დანიშვნით "აღფრთოვანებული არაა", თუმცა კანდიდატურის შერჩევა პარლამენტის კომპეტენცია არ იყო.

დიმიტრი ცქიტიშვილის აზრით, თუ რატომ დაინიშნა ქალების შევიწროვებაში ბრალდებულის, ზვიად დევდარიანის ადვოკატი, ქალი პრეზიდენტის საპარლამენტო მდივნად, არასამთავრობო ორგანიზაცია საფარის წარმომადგენელი, ბაია პატარაია დაინტერესდა.

დიმიტრი ცქიტიშვილის თქმით, გაბუნია სხვა ინსტიტუტმა დანიშნა და მთავრობა ან პარლამენტი ამ გადაწყვეტილებაში არ უნდა ჩაერიოს.

"არ ვცდილობთ, რომ ვინმე დავარწმუნოთ ჩემი მოსაზრების გულწრფელობაში, ჩვენ ვმოქმედებთ ისე, როგორც მიგვაჩნია სწორად. თუ ვინმეს ეჭვი შეეპარება მათი ნება და უფლებაა. დიდად არ ვარ აღფრთოვანებული მაგრამ ეს პრეზიდენტის კომპეტენცია იყო. ეს იყო მისი გადასაწყვეტი", — განაცხადა დეპუტატმა.

ქალთა მოძრაობა დიმიტრი გაბუნიას საპარლამენტო მდივნის პოზიციაზე დანიშვნის გასაპროტესტებლად შაბათს აქციას გამართავს. როგორც იდა ბახტურიძემ On.ge-ს განუცხადა აქციის გამართვის ადგილი და დრო ჯერჯერობით უცნობია რადგან საორგანიზაციო საკითხებს ამ დრომდე ათანხმებენ.

ქალთა მოძრაობამ რამდენიმე არასამთავრობო ორგანიზაციასთან ერთად გაბუნიას საკითხზე განცხადება ჯერ კიდევ მაშინ გაავრცელა, როცა მისი დანიშვნის შესახებ ინფორმაცია დადასტურებული არ იყო. ქალები მოუწოდებდნენ პრეზიდენტს არ დაენიშნა გაბუნია საპარლამენტო მდივნად.

"რას აკეთებდა რო ისეთს, რომელსაც ნებისმიერი ჩვენგანი არ აკეთებს?.. — სამოქალაქო ორგანიზაციებს მიგვაჩნია, რომ #metoo-ს ეპოქაში, სახელმწიფო სამსახურში ასეთ მაღალ და საპასუხისმგებლო პოზიციას არ უნდა იკავებდეს გენდერულად არამგრძნობიარე ადამიანი, რომელმაც სექსუალური შევიწროება ლამის ნორმად და მისსავე პირად პრაქტიკად წარმოგვიჩინა", — ეწერა ერთობლივ განცხადებაში.

საქართველოს მეხუთე პრეზიდენტმა, სალომე ზურაბიშვილმა პირველ სამუშაო დღეს ადმინისტრაციის ხელმძღვანელი და საპარლამენტო მდივანი წარადგინა. დიმიტრი გაბუნია, რომელიც საპარლამენტო მდივნის პოზიციას იკავებს არაერთ გახმაურებული საქმეში მონაწილეობდა ადვოკატის სტატუსით. ის იყო ქალთა მიერ სექსუალურ შევიწროებაში დადანაშაულებული ზვიად დევდარიანის ადვოკატიც.