საქართველოს პრეზიდენტის ადმინისტრაციის ხელმძღვანელის ლაშა ჟვანიას განმარტებით, სალომე ზურაბიშვილმა ამბასადორიალი 2018 იმიტომ გააცდინა, რომ დღეს, 17 დეკემბერს მედიასთან ერთად ათონელის რეზიდენციაში შესულიყო. მისი თქმით, პრეზიდენტი ელჩებს სხვა ფორმატში აუცილებლად შეხვდება.

"სალომე ზურაბიშვილი ამბასადორიალზე იმიტომ არ მივიდა, რომ დღეს, თქვენთან ერთად არის აქ. დილას ჰქონდა სხვა შეხვედრები და ელჩებს რაიმე ფორმატში შეხვდება, ბუნებრივია", — განუცხადა On.ge-ს ლაშა ჟვანიამ.

მისივე თქმით, ზურაბიშვილი პირველ საერთაშორისო ვიზიტს ბრიუსელში თებერვალში გამართავს. სწორედ ამ დროსაა დაგეგმილი მიუნხენის კონფერენცია, სადაც პრეზიდენტი პრემიერ-მინისტრთან ერთადაა მიწვეული.

საქართველოში ამბასადორიალი 2018 გაიხსნა, რომელსაც საქართველოს პარლამენტი მასპინძლობს. ღონისძიება მიწვეული იყო საქართველოს პრეზიდენტი, სალომე ზურაბიშვილი, რომელიც ამბასადორიალზე არ მივიდა.

საგარეო საქმეთა სამინისტროს მიერ გუშინ გავრცელებულ პრესრელიზში ეწერა, რომ სიტყვით გამომსვლელებს შორის პრეზიდენტი სალომე ზურაბიშვილიც იყო.

საგარეო საქმეთა მინისტრის, დავით ზალკალიანის განცხადებით, სალომე ზურაბიშვილი უნდა დასწრებოდა ამბასადორიალს თუმცა, მან ადმინისტრაციული საქმეების გამო ვერ მოიცალა დიპლომატიური მისიების ხელმძღვანელებთან შესახვედრად.