საქართველოს მეხუთე პრეზიდენტმა, სალომე ზურაბიშვილმა მედიას კომუნიკაციის ახალი ფორმა შესთავაზა. ზურაბიშვილის თქმით, სურს მათთან სხვა ფორმატით ჰქონდეს ურთიერთობა, რაც "ოფრექორდ" საუბარს ითვალისწინებს.

კერძოდ, პრეზიდენტმა განაცხადა, რომ საკუთარ პრესკლუბს შექმნის, რომელშიც ჟურნალისტებს შეხვდება და ჩაწერის გარეშე გაესაუბრება.

"ისეთ საკითხებზე, რომელიც აუცილებელი არის თქვენთვის რომ იცოდეთ და არ არის აუცილებელი, რომ გახდეს საჯარო ინფორმაცია იმ წამსვე. ეს არის იმისთვის, რომ თქვენ უფრო კარგად გაიგოთ", — განაცხადა ზურაბიშვილმა პირველ სამუშაო დღეს ათონელის რეზიდენციაში.

ზურაბიშვილის თქმით, ასეთ ფორმატს საგარეო საქმეთა სამინისტროში იყენებდა. პრეზიდენტს მიაჩნია, რომ მსგავსი ფორმატი ჟურნალსტებისთვისაც საინტერესო იქნება. მისი თქმით, პრესკლუბი, სავარაუდოდ, დღესასწაულების შემდეგ დაიწყებს მუშაობას.

პრეზიდენტმა აღნიშნა ისიც, რომ პრესასთან ისევ ნათია პავლიაშვილი იმუშავებს. მისივე თქმით, პიარის მიმართულება უფრო გაძლეირდება და ახალ თანამშრომლებს აიყვანენ. გარდა ამისა, დღეს პრეზიდენტმა ოფიციალურად წარადგინა საპარლამენტი მდივანი და ადმინისტრაციის უფროსი.

ზურაბიშვილი და მედია

ზურაბიშვილი წინასაარჩევნო პერიოდში მედიის მიმართ ნეგატიური განწყობებით გამოირჩეოდა. იყო შემთხვევა, როცა ჟურნალისტებს "ტვინის განძრევისკენ" მოუწოდებდა. ჟურნალიტების დასმულ კითხვებს ხშირად არ პასუხობდა ან ამბობდა "როცა დავაპირებ გეტყვით".

არჩევნების პირველი ტურის შემდეგ კანდიდატი მედიასთან არ ჩანდა. ამასთან დაკავშირებული კითხვის პასუხად კი მათ განუცხადა "ყველგან ვარ, სადაც უნდა ვიყო". მეორე ტურში, ეგზიტპოლებს გამოცხადების შემდეგ ზურაბიშვილმა მედიას განუცხადა, რომ ყოველთვის არ პასუხობდა, რადგან "ზოგჯერ ასე იყო საჭირო", თუმცა მათ მომავალში აქტიურ ურთიერთობას დაჰპირდა.