პარტიზანული მებაღეობა თბილისის მერიასთან დღეს, 5 საათზე, შეიკრიბება და თბილისის მერიის ეკოლოგიისა და გამწვანების სამსახურების მაღალჩინოსნების გადადგომის მოთხოვნით ხელმოწერებს შეაგროვებს.

როგორც პარტიზანი მებაღე, ნატა ფერაძე ამბობს, დღევანდელი აქციის სახელწოდება არტიზანული მებაღეობა იქნება და მასში მონაწილე პირები, მხატვრები "მაიმუნო-ვირიშვილოსა და ხეების მოჭრაზე" ნამუშევრებს შექმნიან.

როგორც პარტიზანები ამბობენ, ამ დროისთვის მათ შიმშილობა და მერიასთან ღამისთევა შეწყვიტეს, რადგან მიაჩნიათ, რომ ახლა მნიშვნელოვანია, ენერგია ქმედითი ნაბიჯებისა და მორიგი აქციისთვის შემოინახონ:

"პარტიზანი მებაღეები 27 აგვისტოს გელით მხატვრებს მერიასთან, დიდს და პატარას, მოყვარულს და პროფესიონალს, ერთად შევქმნათ ნახატი. ჩვენ დაგახვედრებთ საღებავებს, ფუნჯებს, ქაღალდის რულონს. ნახატი გამოიფინება მერიასთან", - წერია პარტიზანული მებაღეობის მიერ შექმნილ ივენთში.

პარალურად თბილისის მერის, დავით ნარმანიას გადადგომის მოთხოვნით ხელმოწერებს აგროვებს ენმ, რომელიც დარწმუნებულია, რომ დედაქალაქის მერის გადადგომის მოთხოვნით მათ სხვა დეპუტატებიც შეუერთდებიან და იმპიჩმენტის პროცედურის გახორციელება რთული არ იქნება.