"ალიანსის წევრებმა აღიარეს, რომ ჩვენ ნამდვილად დიდი გამოწვევის წინაშე ვართ რუსეთთან", — ამის შესახებ ნატოს გენერალური მდივნის სპეციალური წარმომადგენელი კავკასიაში, ჯეიმს აპატურაიმ, ნატოსა და ევროკავშირის საინფორმაციო ცენტრში სტუდენტებთან შეხვედრის შემდეგ თქვა.

აპატურაის განცხადებით, მათ სურთ რუსეთთან დიალოგი იმ სიტუაციიდან გამოსასვლელად, რაც ბოლო დროს უარესდება:

"ჩვენ ვიყენებთ ამ დიალოგს, რათა ვუთხრათ მათ, რომ უნდა შეცვალონ ქცევა და ჩვენ გვინდა კარგი ურთიერთობა. გულახდილად გეტყვით, ეს სრულ ევროატლანტიკურ საზოგადოებას სურს, მათ შორის, საქართველოს, მას შემდეგ რაც ისინი დაიცავენ საერთაშორისო სამართლის პრინციპს, პატივს სცემენ თავიანთ მეზობლებს და ჩვენ".

აპატურაის თქმით, სტუდენტების კითხვების ძირითადი ნაწილი სწორედ იმას შეეხებოდა, თუ რამდენად მისცემენ რუსეთს მოქმედებების გაგრძელების საშუალებას:

"ალიანსის წევრებს შორის აღიარებულია ის ფაქტი, რომ რუსეთი არ ცვლის თავის ქცევის ტაქტიკას. ინციდენტები რუსეთსა და უკრაინას შორის შავ ზღვაში, სკრიპალის მოწამლვა დიდ ბრიტანეთში. რას ვაკეთებთ ჩვენ? ჩვენ ვაძლიერებთ ნატოს კოლექტიურ თავდაცვას, ასევე, ვეხმარებით ჩვენს პარტნიორებს, უპირველესყოვლისა საქართველოს, უკრაინას, ბალტიისპირეთის ქვეყნებს, დასავლეთ ბალკანეთს, ვაძლიერებთ კიბერუსაფრთხოებას. ჩვენ ასევე გვინდა დიალოგი".

ნატოს გენერალური მდივნის სპეციალური წარმომადგენელი კავკასიასა და ცენტრალურ აზიაში, ჯეიმს აპატურაი თბილისს დღეს, 12 დეკემბერს ეწვია. ვიზიტის ფარგლებში ის პრემიერ-მინისტრსა და საგარეო საქმეთა და თავდაცვის მინისტრებს შეხვდა.