ექსპრეზიდენტი მიხეილ სააკაშვილი გამოეხმაურა მართლმადიდებელი ეკლესიის პატრიარქის, ილია მეორის განცხადებას არჩევნებთან დაკავშირებით და აღნიშნა, რომ ისიც კი აღიარებს მეორე ტურში "ხმების მოპარვას.

"პატრიარქიდან დაწყებული და ჩვეულებრივი მოქალაქეებით დამთავრებული ყველა აღიარებს და ამბობს, რომ "ხმები მოიპარეს"... მოიპარეს და შედეგები უნდა ვაღიაროთ??? არასოდეს!!!არც ეცადოთ! პასუხი იქნება და უკომპრომისო!", — აცხადებს სააკაშვილი.

დღეს, 9 დეკემბერს, ქადაგებისას ილია მეორემ განაცხადა: "ძალიან ხშირად ისმოდა ასეთი სიტყვებიც, რომ მოიპარეს ხმები. ქალბატონ სალომეს ხომ არ მოუპარავს, ისევ ჩვენ არ მოვიპარეთ? ისევ ჩვენი ნაკლია."

გაერთიანებული ოპოზიცია არჩევნების შედეგებს არ აღიარებს. 2 დეკემბერს ოპოზიციამ აქცია გამართა, სადაც განაცხადეს, რომ სალომე ზურაბიშვილი მათი პრეზიდენტი არ არის. ვაშაძემ აქციის მონაწილეებს მოთხოვნები წარუდგინა: ვადამდელი საპარლამენტო არჩევნები, საარჩევნო სისტემის ძირეული ცვლილება, საოლქო კომისიების გაუქმება და საჯარო მოხელეების საარჩევნო პროცესში ჩართულობის აკრძალვა.

ოპოზიციამ ხელისუფლებას 16 დეკემბრამდე, ინაუგურაციამდე მისცა დრო. პარლამენტის თავმჯდომარე, ირაკლი კობახიძე ოპოზიციას ვადამდელ საპარლამენტო არჩევნების მოთხოვნაზე უპასუხა და მოუწოდა, რომ "ნუ გაიქაჩებიან იმაზე, რისი რესურსიც არა აქვთ".