საქართველოს მოქმედმა პრეზიდენტმა, გიორგი მარგველაშვილმა განაცხადა, რომ ექსპრემიერის, ზურაბ ჟვანიას მკვლელობასთან დაკავშირებით პასუხგაუცემელი კითხვები არსებობს.

"13 წელიწადი გავიდა მისი გარდაცვალებიდან, თუმცა მისი სიკვდილის გამო ტკივილი არც განელებულა და სამწუხაროდ, არც ბოლომდე გვინახავს გამოძიების შეგედი. ეს მართლაც არასასიამოვნოა, რომ ჩვენ ბოლომდე არ ვიცით და პასუხი არ არის გაცემული ამ უმნიშვნელოვანესი პოლიტიკური ლიდერის მკვლელობის თაობაზე", — განაცხადა მარგველაშვილმა.

ზურაბ ჟვანიას საქმე

2005 წლის 3 თებერვალს ზურაბ ჟვანია და ქვემო ქართლის გუბერნატორის მოადგილე რაულ უსუპოვი გარდაცვლილი იპოვეს. იმდროინდელი ხელისუფლების და საგამოძიებო უწყებების ოფიციალური ვერსიით მათი გარდაცვალების მიზეზი მხუთავი აირის გაჟონვა გახდა.

ზურაბ ჟვანიას ოჯახის წევრები ამტკიცებდნენ, რომ ის მოკლეს. ექსპრემიერის ძმა, გოგლა ჟვანია აცხადებდა, რომ ამის მიზეზი პოლიტიკური მოტივი იყო. ჟვანის საქმე პოლიტიკური სპეკულაციების საგანი გახდა.

ხელისუფლების ცვლილების შემდეგ, 2014 წელს პროკურატურამ ჟვანიას საქმის ხელახალი გამოძიება დაიწყო და სასამართლო ექსპერტიზის ეროვნული ბიუროს სასამართლო-სამედიცინო ექსპერტიზის განყოფილების ყოფილი გამგე ლევან ჩაჩუა და ჟვანიას დაცვის ცვლის უფროსი მიხეილ ძაძამია დააკავა. ამის მიზეზი YouTube-ზე გავრცელებული ვიდეომასალა გახდა, რომელზეც ჩანდა რომ გარდაცვლილ ჟვანიას სხეულზე დაზიანებები ჰქონდა.

პროკურატურის ბრალდებით, ლევან ჩაჩუამ ყოფილი პრემიერმინისტრის გარდაცვალების საქმეზე სასამართლო-სამედიცინო ექსპერტიზის ჩატარების მიზნით, გვამების გამოკვლევისას გამოიჩინა გულგრილობა და არაჯეროვნად შეასრულა სამსახურებრივი მოვალეობა. მათივე თქმით, მიხეილ ძაძამიამ ექსპრემიერი მარტო დატოვა რისი უფლებაც არ ჰქონდა. უწყებაში ამბობდნენ, რომ ვინაიდან წარმოებული გამოძიებით ეჭვქვეშ დადგა ჩატარებული ექსპერტიზის დასკვნის ნამდვილობა, საქმეზე აუცილებელი გახდა ახალი ექსპერტიზის ჩატარება.

ამ ამბავს მაშინდელი პრემიერი ირაკლი ღარიბაშვილი მთავრობის სხდომაზე გამოეხმაურა. ღარიბაშვილმა აღნიშნა, რომ ჟვანიას საქმესთან დაკავშირებით ძალიან ბევრი საეჭვო გარემოება იკვეთებოდა. ამას ამბობდა ქართული ოცნების თავმჯდომარე ბიძინა ივანიშვილიც, რომელმაც განაცხადა, რომ არსებობს ეჭვი იმის შესახებ, რომ ექსპრემიერი მოკლულია.

ლევან ჩიჩუას საქალაქო სასამართლომ პატიმრობა შეუფარდა, სააპელაციომ კი ის გაამართლა. პროკურატურამ უზენაეს სასამრთლოს მიმართა, თუმცა საქმე წარმოებაში არ მიიღეს. რითიც უზენაესმა სასამართლომ ძალაში დატოვა სააპელაციო სასამართლოს გადაწყვეტილება, რომ ჟვანიას საქმის სამედიცინო ექსპერტი ლევან ჩაჩუა საქმეში უდანაშაულო იყო.

პოლიტიკოსთა ნაწილი აცხადებს, რომ ამ ქმედებით სასამართლომ გაიზიარა ზურაბ ჟვანიას მხუთავი აირით მოწამვლისა და გარდაცვალების ვერსია.