შინაგან საქმეთა სამინისტროს ინფორმაციით, საქართველოში განსაკუთრებით დიდი ოდენობით ნარკოტიკული საშუალების უკანონოდ შემოტანის ფაქტი აღკვეთეს. უწყებაში ამბობენ, რომ თბილისის საერთაშორისო აეროპორტში ამერიკის მოქალაქე დააკავეს, რომელსაც პირადი ნივთების ჩხრეკისას 229 შეკვრად დაფასოებული ნარკოტიკული საშუალება ჰეროინი უპოვეს.

მათივე თქმით, ბრალდებულს თან ჰქონდა ნარკოტიკული საშუალების შემცველი 101 აბი და 9 ქილაში დაფასოებული სხვადასხვა სახის ნარკოტიკი, რაზეც დანიშნულია შესაბამისი ექსპერტიზა.

გამოძიება ნარკოტიკული საშუალების უკანონო შეძენა-შენახვისა და საქართველოში უკანონოდ შემოტანის საქმეზე მიმდინარეობს, საქართველოს სისხლის სამართლის კოდექსის 260-ე და 262-ე მუხლებით. დანაშაული 8-დან 20 წლამდე ან უვადო თავისუფლების აღკვეთას ითვალისწინებს.